ShQO-daǵy óndiristik nysandarda 1300-den astam zańbuzýshylyq anyqtaldy
ShQO TJD baspasóz qyzmetiniń málimetine súıensek, oblys ákiminiń orynbasary Nurjan Jumadilovtiń tóraǵalyǵymen tótenshe jaǵdaılardyń aldyn alý jáne joıý jónindegi komıssııanyń kezekti otyrysy ótti. Jıyn barysynda aldaǵy ýaqytta ótetin «Qys» respýblıkalyq komandalyq-shtabtyq oqý-jattyǵýǵa jeke quram men tehnıkanyń daıyndyǵy, óńirdegi sý tasqynyna qarsy is-sharalar, seısmıkalyq qaýipsizdik jáne óndiristegi jaraqattanýdyń aldyn alý máseleleri sóz etildi.
«Respýblıkalyq oqý-jattyǵý Shyǵys Qazaqstanda ótedi. Sebebi oblystyń qysy qatal, burqasyn jáne kóshkin túsý qaýpi joǵary. Tek ótken qys mezgilinde 55 daýyldy eskertý jarııalanyp, jolda qalǵan 249 adam qutqarylǵan. Kóshkin qaýpi bar ýchaskelerdi tazartý úshin 90 ret jarylys jumystary júrgizildi. Osyndaı oqý-jattyǵý jyl saıyn ótkiziledi», - dedi departamenttiń TJ joıý basqarmasynyń bastyǵy Rınat Qondybaev.
Eldi mekenderdi sý tasqynynan qorǵaý úshin Shyǵys Qazaqstanda 11 shara qolǵa alynǵan. Qazirgi ýaqytta Tarbaǵataı aýdany Qyzyl Kesik aýylyndaǵy taý bókterindegi bógetti nyǵaıtý, Tebiske, Qarǵyba, Tasjyra ózenderiniń arnalaryn tazartý, Qarasý aýylynda jaǵalaýdy nyǵaıtý jáne Mańyraq aýylyndaǵy bógetti aǵymdaǵy jóndeý jumystary aıaqtaldy. Zaısan aýdanynda Jemeneı ózeniniń arnasyn tazartý, Katonqaraǵaı aýdanyndaǵy Buqtyrma ózenindegi jaǵalaýdy nyǵaıtý jumystary júrgizilgen.
«Jyl basynan beri ónerkásiptik qaýipsizdikti qamtamasyz etý úshin 65 tekserý jasaldy. Sonyń barysynda 484 nysan tekserýden ótip, 1330 zańbuzýshylyq anyqtaldy. Inspektorlar jalpy somasy 8 751 000 teńgege ákimshilik quqyqbuzýshylyq týraly hattamalar toltyrdy», - dedi Ónerkásiptik qaýipsizdik komıtetiniń ShQO boıynsha departamentiniń bastyǵy Andreı Izmaılov.
