ShQO-daǵy lagerde omyrtqasy synǵan oqýshy qyzǵa qatysty qylmystyq is qaıta qozǵaldy

ÓSKEMEN. QazAqparat – Shyǵys Qazaqstan oblysyndaǵy balalar lagerinde oqýshy qyz jaraqat alyp, qylmystyq is qozǵaldy. Bul týraly Adam quqyqtary jónindegi ýákil Elvıra Ázimovaniń baspasóz qyzmeti málim etti, dep habarlaıdy QazAqparat tilshisi.

Adam quqyqtary jónindegi ýákildiń atyna Abaı oblysynyń turǵynynan aryz tústi. Áıeldiń aıtýynsha, onyń kámelettik jasqa tolmaǵan qyzy osy jyldyń shilde aıynda Shyǵys Qazaqstan oblysyndaǵy balalar lagerinde jaraqat aldy. Naqty aıtqanda, omyrtqasy synyp, ortasha dárejedegi dene jaraqaty keltirilgen.

«Alaıda, Altaı aýdandyq polıtsııa bóliminiń qyzmetkerleri balalar lageri ákimshiliginiń bala ómiri men densaýlyǵynyń qaýipsizdigin qamtamasyz etý boıynsha mindetterin oryndamaý faktisi boıynsha qozǵalǵan isti qylmys quramynyń joqtyǵyna súıenip jaýyp tastaǵan. Aryz ben materıaldardy zerdeleý barysynda qylmystyq is júrgizý zańnamasynyń buzylýy anyqtalyp, ShQO polıtsııa departamentine, ákimdikke, prokýratýraǵa jáne Oqý-aǵartý mınıstrligi balalardyń quqyqtaryn qorǵaý komıtetine qosymsha dáleldermen ótinishhat jiberildi», - delingen aqparatta.

Prokýratýra Ombýdsmenniń ótinishin qoldaǵan. Nátıjesinde, buryn toqtatylǵan is qaıta jandanyp, bala men ananyń quqyǵy qorǵaldy.