ShQO-daǵy qutqarýshylar ózderi týraly: Olar qaıda qarap otyr deıtinder bar

Marat Smaqov, Zyrıan aýdanyndaǵy №3 órtten qutqarý bólimi:

«31 naýryz kúni Zýbov kentine Buqtyrma ózeni qaýip tóndirgen bolatyn. Tańǵy saǵat 8.00-de sonda boldyq. Tasqynnyń aǵyny qatty edi. Úılerge jaıaý jetý múmkin emes. Túske deıin 3 kósheniń turǵyndaryn qutqardyq. Bir úıden eki balasy men áıeldi ózim jalǵyz alyp shyǵýǵa týra keldi, adam jetispeı jatqan. Tústen keıin aýdan ortalyǵyna qaıtyp, «Eski qaladaǵy» turǵyndardy qutqardyq. Mundaǵy sýdyń tereńdigi 3 metrge deıin jetetin. Bir qarııanyń úıine kelsem, sý terezeden asyp ketken eken. Ózi jylap júr. Úıden shyǵýdan bas tartty. Áreń degende kóndirip, arqalaǵan qalpy syrtqa bettegende jertólege túsip kettik. Belýardan keletin sýdan aıaqtyń asty kórinbeı qalǵan ǵoı. Sý alǵash kirgende qarııa jertóleniń qaqpaǵyn ashyp tastaǵan eken. Qudaı ońdap, ekeýmiz de jaraqat almappyz. Sol kisini qutqarýǵa 30 mınýttaı aınaldym.

Adamdardy alyp shyqqannan keıin úı haıýandaryn qutqaramyz. Sondaı sáttiń birinde aıaǵymnan ıt qaýyp aldy. Rezeńke etikten tisi ótpedi qaıta. Taǵy bir úıdiń turmystyq tehnıkasy bir apta buryn nesıege alynǵan eken. Kózderinshe sý astynda qaldy. Keıbireýlerdiń 2-3 mln teńgege nesıege alǵan kólikteri sýǵa ketti. Tek erteńinde sýdan shyǵaryp jatty.  Tehnıka barýy múmkin bolmaǵan úılerge qaıyqpen jetip, adamdardy shyǵardyq. Neshe úıden neshe adamdy shyǵarǵanymyz esimde joq. Ony sanaıtyn ýaqyt qaıda? Qazir de sol apattyń saldaryn joıýmen shuǵyldanyp jatyrmyz»,- deıdi ol.
 

Nurlan Kishibaev, Aıagózdegi №50 órt sóndirý bóliminiń qaraýyl bastyǵy:

«Bizdiń bólim Aıagózdegi qutqarý jumystaryna bastan-aıaq qatysty. Eń birinshi Toqsanǵazın jáne Baraq batyr kóshelerindegi turǵyndardy kóshirý týraly tapsyrma tústi. Bólim basshysynyń mindetin atqarýshy Erjan Órtbaev bárimizge qysqasha nusqaý berip, mindetterimizdi pysyqtady. Eń birinshi kezekte jarymjandar men júkti áıelder, balalar men názik jandylar shyǵaryldy. Eń sońynda ǵana er adamdary qutqardyq. Tasqynnyń alǵashqy kúni «112» nomerine 70-ten astam qońyraý tústi. Kólik qozǵalysy qıyndaǵandyqtan, arasy bir shaqyrym bolatyn kóshelerdiń ortasynda jaıaý júgirip júrdik. Qarbalas kezinde bir turǵynnyń sýǵa ketkeni týraly dabyl jetti. Biz barǵan kezde kórshileri qutqaryp alǵan bolyp shyqty. Al bir qarııa umyt qalǵan dárisi esine túsip, úıine qaıta kirmekshi bolǵan. Bizdiń aıtqanymyzǵa kónbegen soń ýchaskelik polıtsııany shaqyryp, úıinen áreń alyp shyqtyq. Ózge óńirlerden kómek kelip jetkenshe 24 qutqarýshy júrdik. Bizdiń jetpeı jatqanymyzdy kórgen turǵyndar da jappaı kómekke júgirdi. 400 adamdy biz ǵana qutqaryp qalýymyz múmkin emes edi. Bizdiń eńbegimiz kórinbeı qalsa kerek, «tótenshe jaǵdaı qyzmeti qaıda qarap otyr» degenge saıatyn ókpe-renishter de aıtylyp jatty. Eń bastysy adam shyǵyny bolǵan joq. Esimizdi endi jıyp jatyrmyz».

Dáýrembek Muhamatjanov, Ońtústik Qazaqstan oblysynan  jiberilgen bólimshe komandıri:

«Alǵashynda bul jaq sýyq sııaqty kóringen, keıin úırenip kettik. Bizdiń bólimshede 26 adam bar. Basynda Glýoboke aýdanynyń Progress aýylyndaǵy apat saldarymen kúressek, qazir Zyrıan qalasynda júrmiz.  Munda kelgenimizge 4 kún boldy. Progreske jetkende turǵyndar qutqarylyp qoıǵan eken. Biz úılerdi sýdan sorǵyttyq. Baspanasyn túbirimen shaıyp ketken adamdardy kórdik. Janyń ashıdy. Búgin tańerteń Progress aýylynyń ákimimen sóılestim. Sý qaıtyp, adamdar úılerine oralyp jatqan kórinedi. Mekteptegi ýaqytsha baspanada eshkim qalmapty. Keıbir turǵyndar qońyraý shalyp, alǵystaryn aıtyp jatyr. Zyrıan aýdanynda da tek apat saldaryn joıýǵa qatysyp jatyrmyz. Júzdegen adamdy jergilikti mamandar men ákimdik ókilderi óz kúshterimen qutqarǵan eken. Mundaǵy úılerdiń jaǵdaıy áli aýyr. Keıbir jerlerde sý úıdiń shatyrynan asyp ketken».
 

Nurlan Kıikpaev, Shemonaıha aýdanynyń Verh-Ýba aýylyndaǵy órt sóndirý beketiniń basshysy:

«Kozlıha ózeniniń bulaı tasyǵanyn kónekóz qarııalar 50 jyl buryn kóripti. Qaramaǵymdaǵy úsh adammen birge 48 aýyldasymyzdy qutqardyq. Onyń jeteýi - bala. Tasqynnyń qatty bolǵany sonsha, arnaıy tehnıkadan basqa kólikter júre almaı qaldy. Biz órt sóndirgish mashınamen qatynadyq. Jastaý adamdar jyldam qımyldap, aıtqanymyzdy eki etpeı oryndady. Al egdeleý adamdar apat saldaryn óte aýyr qabyldaıdy eken. Ondaı kezde pıshologtyń róline enýge týra keledi. Egde adamdardy bizdiń bıik kólikke otyrǵyzýdyń ózi qaýipti edi. Ákimdikten jeńil kólik aldyryp, oǵan deıin arqalap apardyq. Adamdardy aman alyp shyqqan soń, múlikterin sý tımeıtindeı etip jınadyq. Eń qajet degen kıim-keshegi men azyq-túligin ýaqytsha baspanasyna jetkizip berdik. Keıbir kisilerdiń baram degen týysy úıinde joq bolyp shyǵyp, basqa mekenjaıǵa tasydyq. Bir úıdiń sıyry jańadan tóldegen eken. Jan-jaqtap júrip qurǵaq jerge kóterip apardyq. Qazir Kozlıha arnasyna tústi. Qaýiptiń beti beri qarady ma dep otyrmyz».

Aıta keteıik, búgin Zyrıan aýdanyna barǵan oblys ákimi Danıal Ahmetov jaǵdaı turaqtalyp, sý deńgeıiniń túskenin aıtty. Onyń aıtýynsha, mundaǵy toǵyz eldi mekende sýdyń beti qaıtyp, ózender arnasyna túsken.

«Endi Katon-Qaraǵaı aýdanyndaǵy Sennoe eldi mekeni aýmaǵynda muz keptelisi týyndaý qaýpi bar. Danıal Ahmetov ondaǵy muz jarý jumystaryn erteń bastaýdy tapsyrdy. Jalpy, apta sońyna qaraı oblysta aýa temperatýrasy temperatýra 17 gradýsqa deıin kóteriledi dep kútilýde. Sol sebepti aımaqty sý alý qaýpiniń kezekti tolqyny bastalýy yqtımal. Onyń aldyn-alý sharalaryna jergilikti bılik barynsha daıyndyq júrgizýde» - deıdi ákimniń baspasóz qyzmeti.