ShQO-daǵy qurylys kompanııasy turǵyndardan 500 mln teńgeni zańsyz tartqan
ShQO ákimdiginde ótken jınalys barysynda úıdi aldyn ala brondaýǵa dep halyqtan zańsyz aqsha tartqan «Deıneka» kompanııasynyń máselesi talqylandy. Jıynǵa prokýratýra men memlekettik kirister departamentiniń qyzmetkerleri qatysty.
«Áli kúnge deıin sol úılerdiń qurylysy aıaqtalmaı tur. Kompanııa qoldanystaǵy zańnamada kózdelmegen birneshe tásilmen turǵyndardan jarty mıllıard teńgege jýyq qarajat tartty. Quzyrly vedomstvolardyń dereginshe, qazirgi ýaqytta adamdarǵa júz mıllıon teńge qaıtarylǵan. Alaıda birneshe adam kompanııanyń jalpy somanyń on paıyzyn ustap qalǵanyn aıtyp shaǵymdanýda. Bul zańbuzýshylyq, azamattarǵa sáýir aıyna deıin qarajattary tolyǵymen qaıtarylýy kerek», - deıdi oblys ákimi Danıal Ahmetov.
Másele ákimdik pen qadaǵalaý organdarynyń qatań baqylaýyna alynǵan. Sondaı-aq kompanııanyń ınvestorlary áli kúnge deıin belgisiz bolyp otyr.
«Qala ákimine osyny anyqtaýdy tapsyrdym. Brondaý sharttaryn qoldanyp, nysandardy aıaqtaýǵa mindetteme alǵan basqa kompanııalarǵa da muqııat nazar aýdarý kerek. «Deıneka» kompanııasy sııaqty jaǵdaı endi qaıtalanbaýy tıis», - dedi aımaq basshysy.