ShQO-daǵy qoǵamdyq birlestik kópbalaly jáne turmysy tómen otbasylarǵa kómek kórsetýde
«Jan Ana» qoǵamdyq birlestigi 2019 jyly erikti analar toby retinde óz jumysyn bastaǵan. Sol ýaqyttan beri kópbalaly jáne az qamtylǵan otbasylarǵa arnalǵan memlekettik baǵdarlamalardyń tıimdi júzege asyrylýyna jan-jaqty kómek kórsetip keledi.
«Áleýmettik jeliler arqyly halyqqa túsindirý jumystaryn júrgizýdemiz. Qordalanǵan túrli máselelerdi tıisti memlekettik organdarǵa joldap, sheshý joldaryn qarastyrdyq. Koronavırýs pandemııasy kezinde kópbalaly, az qamtylǵan otbasylardy 3000 maskamen qamtamasyz ettik. Ár maskany birlestik músheleri óz qoldarymen tikti. Aýyr jaǵdaıda qalǵan otbasylarǵa járdem kórsetý úshin demeýshiler izdeýmen aınalysamyz. Solar arqyly azyq- túlikpen, dári-dármekpen qoldaý kórsetýdemiz. Pandemııa kezinde 350 otbasyna osylaı qoldaý kórsetildi», - deıdi qoǵamdyq birlestiktiń jetekshisi Gúljamal Bershimbekova.
2022 jyldyń aqpan aıynda birlestik zańdy túrde tirkelgen. Qazir onda erikti jumys toby bar. Jumys tobynyń 8 múshesi – kópbalaly ana. «Jan Ana» qoǵamdyq birlestigi 8 naýryz merekesine oraı kópbalaly analarǵa jáne qyzdarǵa ShQO Dostyq úıinde úlken merekelik is-shara uıymdastyrǵan. Al Ulystyń uly kúni qarsańynda Óskemendegi ortalyq alańda 6 qanatty kıiz úı tigip, 250 lıtr naýryz kóje men 2000 baýyrsaq taratyldy. Qurban aıt kezinde 270-ke jýyq otbasyna qaıyrymdylyq jasaldy.
«Sonymen qatar birlestik analary qoǵamdyq is-sharalardan qalys qalmaıdy. Olar «Samal» saıabaǵyndaǵy alma aǵash kóshetterin otyrǵyzýǵa atsalysty. «Mektepke jol» aktsııasy aıasynda demeýshilerdiń qoldaýymen 35 balaǵa qajetti zattar satyp alyndy. Dál qazirgi tańda bizde birneshe kýrs jumys istep tur. Atap aıtqanda, tiginshilikke, shashtaraz bolýǵa úıretý, balalardy beıneleý ónerine baýlý, qarttar men kompıýterdi qoldana almaıtyndarǵa memlekettik qyzmet túrlerin alýdy kórsetý jáne ulttyq salt-dástúrdi dáripteý kýrsy bar. Budan bólek, osynda kelgen azamattar zańger men psıhologtyń keńesin ala alady. Búginde osy qyzmetterdi alý úshin 380 ana jáne 87 bala júgingen. Aldaǵy ýaqyttaǵy oblysta otbasyn qoldaý ortalyǵyn ashqymyz keledi», - deıdi Gúljamal Bershimbekova.
