ShQO-daǵy kitaphananyń VR-kıiz úıine baratyn jastar sany artyp keledi
Óskemen qalasynda ornalasqan Oralhan Bókeı atyndaǵy kitaphanada túrli baǵyttaǵy 10-nan astam úıirme bar. Sonyń biri – VR-kıiz úıi. Kıiz úıge kirip, zamanaýı tehnologııanyń kómegimen álemniń kez kelgen jerine saıahat jasaýǵa bolady. Bul ásirese múmkindigi shekteýli balalarǵa qyzyqty.
«2022 jyldy Balalar jyly dep jarııalaǵan Prezıdent Qasym-Jomart Toqaev bilim salasyn damytý úshin jańa tehnologııalardy da meńgerý kerektigin aıtqan bolatyn. Kitaphanamyz zaman talabyna saı jabdyqtalǵan. Eń alǵash VR-kıiz úıi ashylǵan kezde bizde tek VR kózildirik bolǵan edi. Sodan keıin arnaıy baǵdarlamalardy qoldanyp, túrli kórinister jasaı bastadyq. Osy úıirme ashyla salysymen qyzyǵýshylyq tanytqandar kóp boldy. Qazir kún saıyn osynda keletin jastar sany artyp keledi», - deıdi kitaphana qyzmetkeri Tańnur Bashaı.
Onyń aıtýynsha, mundaǵy negizgi maqsattardyń biri – oqyrmanǵa ózderi oqyǵan kitaptaryndaǵy keıipkerlerdiń beınesin osy qurylǵy arqyly kórsetý. Sóıtip, jastardyń kitapqa degen qyzyǵýshylyǵyn arttyrý. Máselen, kitaphana qyzmetkerleri Oralhan Bókeıdiń týǵan jeri men keıipkerleriniń beınesin dál kórsetken.
«Sondaı-aq Oralhan Bókeı, Muhtar Áýezov jáne Sherhan Murtazanyń ústel basynda áńgimelesip otyrǵanyn beıneledik. Kıiz úıdegi VR kózildirikti kıip, ózińizdi sol qalamgerlerdiń qasynda otyrǵandaı sezine alasyz», - deıdi Tańnur Bashaı.
