ShQO-daǵy ken baıytý fabrıkasynda jumysshy qaza boldy
ÓSKEMEN. QazAqparat – Shyǵys Qazaqstan oblysyndaǵy Aqtoǵaı ken ornynyń ekinshi baıytý fabrıkasynyń qurylys alańynda jazataıym oqıǵa boldy, dep habarlaıdy QazAqparat tilshisi.
KAZ Minerals Toby kompanııasy baspasóz qyzmetiniń málimetine súıensek, 7 qyrkúıek kúni saǵat 22:00-der shamasynda montajdaý jumystaryn júrgizý kezinde merdigerlik uıym - ICG kompanııasynyń jumysshysy bıikten qulaǵan. Alǵan jaraqattardyń saldarynan ol sol jerde kóz jumdy.
«Oqıǵa ornyndaǵy jumystar birden toqtatyldy. Qazirgi ýaqytta qaıǵyly jaǵdaıdyń mán-jaıy men sebepteri anyqtalýda. Tergeý jumystaryn júrgizý úshin arnaıy komıssııa qurylǵan. KAZ Minerals Tobynyń basshylyǵy men ujymy marqumnyń týǵan-týystary men jaqyndaryna kóńil aıtyp, qaıǵylaryna ortaqtasady», - delingen málimette.
