ShQO-daǵy kelinder baıqaýynda túrli ult ókilderi baq synady
Glýbokoe aýdanynda dástúrli «Aıaýly jas kelin» oblystyq baıqaýy ótti. Qatysýshylar qazaqtyń salt-dástúrlerin, ádet-ǵuryptaryn bilýden jáne taǵamdaryn ázirleýden saıysqa túsip, shyǵarmashylyq jáne zııatkerlik qabiletterin kórsetti.
Mádenıet úıiniń aldy kishigirim aýylǵa aınaldy. Ár kıiz úıdiń janynda shaı qaınatylyp, qazanda jas kelinder baýyrsaq pisirip, jarystyń kórkin qyzdyrdy. Oblystyq baıqaýǵa alǵashqy ret qatysyp otyrǵan Anjelıka qazaqtyń dástúrinen tańsyq emes. Ol eki jyl buryn qazaq otbasynyń kelini atanǵan.
«Osy ýaqyt aralyǵynda óte kóp dúnıeni úırendim. Qamyr ılep, nan jaıyp, baýyrsaq, shelpek pisirý men úshin úırenshikti is. Aqıyq aqyn Muqaǵalı Maqataevtyń «Úsh baqytym» atty óleńin qazylar alqasy aldynda oqyp berdim. Búgin meniń qasyma jan joldasym, 10 aılyq qyzym qoldap kelip otyr», - deıdi Óskemen qalasynan kelgen qatysýshy Anjelıka Shabdanbekova.
Baıqaýǵa oblystyń ár aýdandarynan kelgen 16 kelin qatysty. Baıqaýdyń «Jas kelinniń bir kúni» atty alǵashqy bóliminde kelinder bir kúndik tynys-tirshiligin kórsetetin beınerolık usyndy. Odan keıin «As adamnyń arqaýy» kezeńinde umytylyp bara jatqan as túrlerin usyndy.
Intellektýaldyq saıysta qazaq halqynyń salt-dástúri, ádet-ǵurpy jaıly túrli taqyryptaǵy suraqtarǵa jaýap berse, shyǵarmashylyq kezeń óz ónerlerin ortaǵa saldy. Biri án aıtsa, biri bı bılep, mánerlep óleń oqydy.
Eń sońǵy «Aq oramal» bóliminde ár ult ókiliniń qatysýshysy kelinniń basyna baılaıtyn oramaldyń shyǵý tarıhy, ereksheligi, oramal taǵý mádenıeti jaıly egjeı-tekjeıli aıtyp berdi.
Saıystyń uıymdastyrylýyna muryndyq bolǵan ShQO Jastar resýrstyq ortalyǵynyń dırektory Araılym Esimbekova jyl saıyn qatysýshylarǵa qoıylatyn talaptar kúsheıtilip kele jatqanyn aıtady.
«Bıyl baıqaýdyń erekshe ári qyzyqty ótýiniń bir sebebi ár jyldary tek qazaq ultynyń qyzdary qatysyp kele jatqan baıqaýdyń aýqymy keńeıip, basqa ult ókilderi de qatysýǵa nıet bildirdi. Demek, endi biz basqa etnostardyń salt-dástúrlerimen jáne erekshelikterimen tanysýǵa múmkindik aldyq. Bul shara otbasylyq qundylyqtardy dáriptep, qoǵamdaǵy analardyń mártebesiniń artýyna sep bolady dep oılaımyn», - deıdi Araılym Esimbekovv.
Saıys qorytyndysyna sáıkes, «Aıaýly jas kelin» baıqaýynda úshinshi oryndy Óskemen qalasynan kelgen qatysýshy Anjelıka Shabdanbekova ıelense, ekinshi oryn Glýbokoe aýdanynyń kelini Ajar Tóleýqanova men rıdderlik Ardaq Maltaevaǵa buıyrdy. Bas júldeni Abaı aýdanynan kelgen Aıdana Baıtýsova jeńip aldy. Baıqaýǵa qatysýshylardyń barlyǵy alǵys hattarmen, júldegerler baǵaly syılyqtarmen marapattaldy.
