ShQO-daǵy Katonqaraǵaı aýdanynda áýejaı salynbaq
El aýzynda «ekinshi Shveıtsarııa» atanyp ketken Katonqaraǵaı aýdanyna keletin týrıster sany jyldan jylǵa artyp keledi. Soǵan oraı munda áýejaı salý kózdelýde.
Bul jaıly oblystaǵy áýejaılardyń ınfraqurylymyn jańǵyrtý jumystary qalaı júrgizilip jatqanyn baıan etken ShQO jolaýshylar kóligi jáne avtomobıl joldary basqarmasy basshysynyń orynbasary Aıjan Rahymbaeva málim etti.
«2018 jyly óńirde áýejaılardyń ınfraqurylymyn jańǵyrtý jumystary bastalǵan. Búginde Óskemen men Semeıdegi áýejaıdy qaıta jańǵyrtý jumystary máresine jetti. Jaqynda Úrjar aýdanyndaǵy áýejaıdyń ushý-qoný jolaǵyn rekonstrýktsııalaý jumystary aıaqtaldy», - dedi ol.
Aıjan Rahymbaevanyń aıtýynsha, qazir áýe aılaǵynyń ushýǵa jaramdylyq sertıfıkatyn alý úshin tıisti sharalar atqarylyp jatyr. Alynǵan soń áýe reısteri birden qaıta jandanbaq. Demek, turǵyndar Alakólge ushaqpen qatynaı alatyn bolady.
«Katonqaraǵaı aýdanynda áýejaı qurylysyn júrgizý josparlanyp otyr. Biraq onyń naqty ýaqyty ázirge belgisiz. Sondaı-aq 2024 jylǵa qaraı Zaısan áýejaıyn rekonstrýktsııalaý jumystary bastalady», - dedi basqarma basshysynyń orynbasary.
