ShQO-daǵy kásiporyndar aýaǵa 64 myń tonnaǵa jýyq zııandy qaldyq shyǵarǵan
ÓSKEMEN. QazAqparat – Shyǵys Qazaqstan oblysyndaǵy kásiporyndar jarty jyldyń ishinde aýaǵa 64 myń tonnaǵa jýyq zııandy qaldyq shyǵarǵan, dep habarlaıdy QazAqparat tilshisi.
ShQO Ekologııa departamenti baspasóz qyzmetiniń málimetinshe, óńirdegi kásiporyndardyń aýaǵa shyǵarǵan zııandy qaldyqtar kólemi bıylǵy alty aıda 63,8 myń tonnany qurap otyr. Onyń negizgi úlesi Óskemen qalasyndaǵy kásiporyndarǵa tıesili (49% nemese 31,2 myń tonna).
«Osylaısha, Óskemenniń lastanýy óte joǵary deńgeıge jetken. Osy kórsetkish boıynsha ol Qaraǵandy, Aqtóbe, Atyraý jáne Petropavl shaharlarynan keıin 5-shi orynda tur. Aýany kúkirt dıoksıdimen lastaýǵa zııandy shyǵaryndylarynyń kólemi 11,6 myń tonnany quraǵan «Kaztsınk» JShS-niń Óskemen metallýrgııa kombınaty eleýli áser etti», - delingen aqparatta.
15 jyl ishinde metallýrgııa kombınatynda kúkirt qyshqylyn óndirýge jáne gaz tazartý júıesi jumysynyń tıimdiligin arttyrýǵa 314 mln AQSh dollary somasyna ınvestıtsııalar quıylǵan. Sonyń nátıjesinde, kúkirtti angıdrıd shyǵaryndylary jylyna 59,2 myń tonnadan 18,7 myń tonnaǵa deıin nemese 70%-ǵa tómendedi.
Alaıda bul sol mańdaǵy turǵyn úılerde ekologııalyq normatıvterdi qamtamasyz etý úshin jetkiliksiz bolyp otyr. Sondyqtan Ekologııalyq kodekstiń jańa erejelerine sáıkes kásiporyn ozyq tehnologııalardy engize otyryp, óndiristik protsesterdi jańǵyrtý qajet. Jaqyn arada «Kaztsınk» JShS osy maqsattaǵy strategııalyq baǵdarlama jobasyn aıaqtap, QR Ekologııa, geologııa jáne tabıǵı resýrstar mınıstrligine usynbaq.
