ShQO-daǵy gepatıt: Naýqastarǵa kómek kórsetýde kemshilikterge jol berildi
ASTANA. QazAqparat - Sholpan aýylyndaǵy gepatıt oqıǵasy boıynsha medıtsınalyq baqylaý qanaǵattanarlyqsyz deńgeıde boldy. Bul týraly Astanada ótken baspasóz máslıhatynda QR Densaýlyq saqtaý mınıstrligi Qoǵamdyq densaýlyq saqtaý komıtetiniń tóraǵasy, bas sanıtarlyq dáriger Jandarbek Bekshın málim etti, dep habarlaıdy «QazAqparat» HAA tilshisi.
«Bizdiń mamandar men ǵylymı ortalyqtardyń ǵalymdary Úrjar aýdanyndaǵy arýhanada bolyp, Sholpan aýylyndaǵy jaǵdaımen tanysty. Bul oqıǵa boıynsha tolyq tekserý júrgizdik, barlyq qujattardy sholyp shyqtyq. Osy oraıda 19 oqıǵany jasyrý jaǵdaıy anyqtaldy, ıaǵnı derttiń jeńil formalary belgili boldy. Sanıtarlyq erejeler boıynsha naýqasty ambýlatorııalyq jaǵdaıda, ıaǵnı úıde emdeýǵa jol beriledi. Alaıda mindetti túrde Qoǵamdyq densaýlyq saqtaý komıtetiniń aýmaqtyq organdaryna málimet berilýi tıis. Sol kezde tıisti sharalar qabyldanady. Bul rette qyrkúıek aıynda birinshi oqıǵa tirkelgen kezde dárigerlik ambýlatorııada dáriger bolmaǵan. Kómek kórsetý tek orta medıtsınalyq qyzmetkerler tarapynan ǵana iske asyrylǵan. Qazan aıynyń basynda bul nysanǵa dáriger kelgen. Ol - jas maman, ıaǵnı 2017 jyldyń túlegi»,- dedi J. Bekshın Ortalyq kommýnıkatsııalar qyzmetinde.
Jalpy, «A» gepatıtine Sholpan aýylynda 31 adam shaldyqqan.
«Osyǵan deıin 12 bala Úrjar aýdandyq aýrýhanasynda jatqyzylǵany habarlanǵan edi. Al qalǵan 19 balany bizdiń komıssııa anyqtady. Olardy osy ambýlatorııa dárigeri kórsetpegen», - dedi komıtet tóraǵasy.
Onyń sózine qaraǵanda, jas dárigerdiń tarapynan kemshilikterge jol berilgen.
«Sonymen qatar Úrjar aýdandyq aýrýhanasy da jas mamannyń kelgenin bile tura, oǵan laıyqty deńgeıde kómek jasamaǵan. Atap aıtqanda, konsýltatıvtik qoldaý men aýrýdyń birinshi oqıǵalary kezinde kómek kórsetilmegen», - dedi bas sanıtarlyq dáriger.
Budan bólek, tekserý barysynda naýqastar dári-dármekti ózderi satyp alǵany belgili boldy. Sondaı-aq 12 oqıǵa boıynsha naýqastar aýrýhanaǵa kólikpen ózderiniń esebinen jetkizilgen. Árqaısysy tasymaldaý sharalaryna 5 myń teńge tólegen. Bul óz kezeginde talaptardy óreskel buzý faktilerine jatady.
Anyqtalǵan osy kemshilikterdiń barlyǵy oblys ákimdigine habarlanyp, kináliler ákimshilik yqpal etý turǵysynda jazaǵa tartylady.
Budan buryn habarlanǵandaı, Shyǵys Qazaqstan oblysy Úrjar aýdanynda 12 balanyń gepatıtke shaldyǵýynyń sebebi anyqtalǵan bolatyn.
Bas sanıtarlyq dáriger Jandarbek Bekshın A gepatıtimen aýyrǵan balaǵa vırýs Semeıden kelgen qonaqtan juqqanyn aıtqan edi.
Shyǵys Qazaqstan oblysynyń Úrjar aýdanyna qarasty Sholpan aýylyna barǵan komıssııa gepatıt «A» dertine shaldyqqandardyń sany 30-dan asqanyn naqtylaǵany habarlanǵan edi.
