ShQO-daǵy etnomádenı uıymdar saılaýǵa belsendi atsalysýǵa shaqyrdy

ÓSKEMEN. QazAqparat - Shyǵys Qazaqstan oblysyndaǵy etnomádenı birlestikterdiń jetekshileri halyqtar Dostyǵy úıindegi Qoǵamdyq kelisim ortalyǵynda jıyn ótkizdi.

Jıynnyń negizgi taqyryby - QR Prezıdentiniń V shaqyrylymdaǵy Parlament Májilisi depýtattarynyń ýákilettiligin merziminen buryn toqtatyp, 2016 jyldyń 20 naýryzynda saılaý ótkizý týraly Jarlyǵy boldy. Memleket basshysynyń halyqqa arnaǵan úndeýindegi árbir pýnkt dóńgelek ústelge qatysýshylardyń tarapynan qyzý talqyǵa tústi.

Shyǵys Qazaqstan oblystyq Qazaqstan halqy Assambleıasynyń músheleri, etnomádenı uıymdarynyń kóshbasshylary, Dostyq úıiniń qyzmetkerleri biraýyzdan parlamenttik saılaý men barlyq deńgeıdegi máslıhat saılaýlaryn birge ótkizý óte tıimdi ekenin atap ótti.

«Prezıdentiń merziminen buryn saılaý ótkizý týraly Jarlyǵy - qazirgi qıyn-qystaý kezeńde óte oryndy jáne der kezinde qolǵa alynǵan qadam boldy»,-deıdi orys mádenı ortalyǵynyń jetekshisi Nıkolaı Zaıtsev.

N.Zaıtsevtiń pikirinshe, álemdik daǵdarysqa baılanysty aldymyzda qıyn kezeńderdiń kútip turǵanyn atap ótken Elbasynyń sózine qulaq túrý kerek. Sondyqtan, qarjyny da, ýaqytty da, tipti jumys oryndaryn da óte únemdeý kerek. «Bizdiń elimiz mundaı qıyndyqty alǵash re kórip otyrǵan joq, degenmen birligimizdi saqtaı otyryp, damýǵa bet ala, qandaı daǵdarysty da jeńgenbiz. Bul joly da Qazaqstan dittegen maqsatyna jetedi degenge kámil senemin. Sebebi, Qazaqstannyń halqy birge»,-dedi sózin túıindegen N.Zaıtsev.

Dóńgelek ústeldiń sońynda etnomádenı birlestikterdiń jetekshileri Shyǵys Qazaqstannyń halqyn saılaýǵa belsendi qatysýǵa shaqyryp, úndeý qabyldady.