ShQO-daǵy ekologııalyq problemalardy sheshýdiń jol kartasy jobasy jasaldy
Vedomstvonyń Telegram kanalyndaǵy aqparatqa sáıkes, jol kartasy aıasynda aldaǵy jyldary Rıdder metallýrgııalyq kesheninde atmosferalyq siltisizdendirý tsehyn salý, óndiris oryndarynan aýaǵa shyqqan qaldyqqa monıtorıng jasaýdyń avtomattandyrylǵan júıesin engizý, jeke sektordy ortalyq jylýmen jabdyqtaý júıesine qosý, oblys qalalarynda lastaýshy zattarǵa saraptama jasaıtyn zamanaýı zerthanalar salý, aǵash otyrǵyzý kólemin arttyrý sekildi 30-ǵa jýyq is-shara josparlanǵan.
«Jergilikti halyq qorshaǵan ortanyń jaǵdaıyna baılanysty istelip jatqan jumystar týraly bilýi tıis. Sondyqtan Jol kartasyn birlesip daıyndaýǵa shaqyramyn, biz barlyq usynystardy tyńdap, eskerýge daıynbyz. Jol kartasy mazmundy, júzege asatyndaı, biraq ambıtsıozdy bolýy kerek. Óńirde problemalar ondaǵan jyldar boıy jınalyp qalǵanyn bilesizder. Sondyqtan olar birden sheshile qoımaıdy. Degenmen óndiristik óńirdegi qorshaǵan ortanyń jaǵdaıyn jaqsartý úshin bar kúshti salýymyz qajet»,- dedi Maǵzum Myrzaǵalıev oblys jurtshylyǵymen ótken Zoom-konferentsııada.
Jol kartasy usynystar qabyldanǵannan keıin qoǵam ókilderine qaıta tanystyrylady.
Onlaın-kezdesýde eko-belsendiler men ǵalymdar atmosferalyq aýanyń lastanýy, oǵan qatysty qabyldanyp jatqan sharalar týraly suraqtar qoıdy. Pikirlerin ortaǵa saldy. Ekologııalyq monıtorıng posttarynyń sanyn kóbeıtýdi surady.
Mınıstr Ekologııalyq kodekste naqty qadamdar kórsetilgenimen, óńirdegi qorshaǵan orta jaǵdaıyn retteý boıynsha jyldamyraq áreket qajettigin alǵa tartty.
«Eýropa «Eń ozyq qoljetimdi tehnologııalar» arqyly ekologııalyq ahýaldy jaqsartýǵa 15 jyl jumsaǵanyn bilemiz. Biz Ekologııalyq kodekste bul merzimdi de eskerdik. Biraq jyldar boıy kútip, qarap otyra almaımyz. Barynsha tezirek áreket etýimiz kerek. Halyqpen, jergilikti atqarýshy organ ókilderimen bas qosyp otyrǵanymyz da sol», - dedi ol.
Ekologııa mınıstriniń sózinshe, ótken jyly óndiris oryndarynan tabıǵatty lastaǵany úshin jınalǵan emıssııa 90 mlrd teńgedeı boldy. Onyń 40 mlrd-y eldegi ekologııalyq jaǵdaıdy jaqsartý sharalaryna baǵyttalǵan.
