ShQO-daǵy eki tasjol ýchaskesinde kólik qozǵalysyna tyıym salyndy
ÓSKEMEN. QazAqparat – Shyǵys Qazaqstan oblysynda qar kóshkini júrý qaýpine baılanysty eki tasjol ýchaskesi jabyldy, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, óńirdegi eki tasjol ýchaskesine qar kóshkini túsýi yqtımal.
«Búgin saǵat 20.00-den bastap respýblıkalyq mańyzy bar «Óskemen-Altaı-Úlken Naryn-Katonqaraǵaı-Rahman qaınarlary» tasjolynyń 6-166 shaqyrymynda (Ýshanov aýyly men Altaı qalasynyń aralyǵy) jáne oblystyq mańyzdaǵy «Óskemen-Tarǵyn-Samar» tasjolynyń 88-145 shaqyrymynda (Joǵary Taıynty men Samar aýyldarynyń aralyǵy) kóliktiń barlyq túri úshin qozǵalysqa tyıym salynady», - delingen aqparatta.
Osy rette, qutqarýshylar óńir jurtshylyǵyna alys saparǵa shyǵar aldynda joldardyń jaı-kúıin «Dármen» mobıldik qosymshasy arqyly tekserip otyrýǵa keńes berdi.
