ShQO-daǵy demalys oryndarynyń deni týrısterdi qabyldaýǵa daıyn emes

ÓSKEMEN. QazAqparat – Shyǵys Qazaqstan oblysyndaǵy demalys oryndarynyń kóbisi týrısterdi qabyldaýǵa daıyn emes, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, óńir boıynsha shomylýǵa ruqsat etilgen 16 ýchaske bar. Munda 80-ge jýyq demalys bazasy ornalasqan. Biraq ázirge olardyń kóbisi qaýipsizdik erejelerine sáıkes kelmeı otyr.

«Búginde demalys oryndarynyń 69-yna tekserý júrgizildi. Belgili bolǵandaı, olardyń tek 15-inde arnaıy daıyndalǵan qutqarýshylar bar. Demek, sol bazalar ǵana jumys isteýge ruqsat ala alady», - dedi ShQO TJD bastyǵynyń orynbasary Dmıtrıı Tıtov.

Jalpy oblysta sýǵa túsýge qatań tyıym salynǵan 64 oryn bar. Dál osy jerlerde qaıǵyly jaǵdaılar jıi tirkelip jatady.

Aıta keteıik, 2021 jyldyń basynan beri Shyǵys Qazaqstan oblysynda 5 adam, onyń ishinde 4 bala sýǵa ketken.