ShQO-daǵy demalys bazasynan 5 mln teńgelik gıdrotsıkl urlaǵandar ustaldy
ÓSKEMEN. QazAqparat – Shyǵys Qazaqstan oblysy Kókpekti aýdanynda gıdrotsıkl urlaǵan 3 er adam ustaldy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, «102» jedel arnasyna 33 jastaǵy er adam habarlasqan. Óz sózinde ol Novostroıka aýylynan 6 shaqyrym jerdegi Buqtyrma sý qoımasynyń jaǵasynan belgisiz bireýlerdiń «BRP» markaly gıdrotsıklyn urlap ketkenin jetkizdi. Osynyń saldarynan jábirlenýshige 5 000 000 teńge mólsherinde materıaldyq zalal keltirilgen.
«Belgili bolǵandaı, gıdrotsıkl esh qaraýsyz turǵan. Beınebaqylaý kameralarynyń jazbasyn qaraý kezinde gıdrotsıkldy jaǵaǵa qaraı ıtergen úsh adam kórindi. Jedel-izdestirý sharalaryn júrgizgen polıtseıler túngi ýaqytta Buqtyrma sý qoımasynyń jaǵalaýynan «Kókpekti-Vasılev ótkeli» tasjolyna qaraı kele jatqan tirkemesi bar kólikti anyqtady. Olar Sheshek asýynda toqtatyldy», - delingen aqparatta.
20-35 jas aralyǵyndaǵy úsh kúdikti tergeý barysynda óz kinálaryn moıyndady. Urlanǵan gıdrotsıkl ıesine qaıtaryldy. Qazirgi ýaqytta atalǵan fakti boıynsha QR QK-niń 188-baby 3-bóligi 1-tarmaǵyna sáıkes sotqa deıingi tergeý amaldary júrgizilýde.
