ShQO-daǵy burynǵy aýrýhananyń ǵımaraty kópqabatty jaıly turǵyn úıge aınalady
ÓSKEMEN. QazAqparat – Shyǵys Qazaqstan oblysynyń Tarbaǵataı aýdanyndaǵy burynǵy aýrýhana ǵımaratyna kúrdeli jóndeý jumystary júrgiziledi, dep habarlaıdy QazAqparat oblystyń Aqparat ortalyǵyna silteme jasap.
Ortalyqtyń habarlaýynsha, aýrýhana ǵımaratyn turǵyn úıge aınaldyrý týraly sheshim turǵyndardyń baspana máselesin sheshý maqsatynda 2011 jyly qabyldanyp, ǵımarat turǵyn úı kezeginde turǵan azamattarǵa berile bastaǵan. Búginde munda 14 kópbalaly otbasy turady. Alaıda ǵımarat kúrdeli jóndeýdi qajet etedi.
ShQO ákimi Danıal Ahmetov Tarbaǵataı aýdanyna jumys sapary barysynda atalmysh turǵyn úı ıelerimen kezdesti.
Basqosý barysynda aımaq basshysy oblystyq bıýdjet esebinen qarajat bólinip, munda jóndeý jumystary júrgizilip, aýla abattandyrylyp, barlyq kommýnıkatsııalyq jeliler jańartylatynyn atap ótti. Osy baǵyttaǵy jumystardy Tarbaǵataı aýdanynyń jańa ákimi Ashat Ismaılov baqylaýda ustaıtyn boldy.
Bul kópqabatty turǵyn úıdiń ıeleri abattandyrý jumystaryna jergilikti turǵyndar da qolǵabys etetinin aıtty.
«Kópbalaly otbasylar jeke qarajattary esebinen mundaı kúrdeli jóndeý jumystaryn júrgize almaıdy. Sondyqtan biz aldaǵy ýaqytta olardyń turǵyn úıleri qaıta qalpyna keltiriletinine qýanyshtymyz. Jóndeý jumystary aıaqtalǵan soń osy aýlada mereke uıymdastyramyz», - dedi Danıal Ahmetov.
