ShQO-daǵy Besqaraǵaı aýylynda tótenshe jaǵdaı jarııalandy
ÓSKEMEN. QazAqparat - Shyǵys Qazaqstan oblysynyń Besqaraǵaı aýdany Besqaraǵaı aýylynda jergilikti aýqymdaǵy tabıǵı sıpattaǵy tótenshe jaǵdaı jarııalandy, dep habarlady «QazAqparat» HAA tilshisi.
«Jer asty sýy burynǵy deńgeıinen tómendemedi, sondyqtan jergilikti atqarýshy organ turǵyndardyń ómiri men densaýlyǵyn saqtaý maqsatynda TJ jarııalaý jóninde sheshim qabyldady», - dep atap ótti ShQO TJD.
Eske salsaq, 14 sáýirde aýyl shetinde tómengi jaqtaǵy 9 úı men 10 aýlany sý basty. 22 adam evakýatsııalandy. 4 kúnde jaǵdaı turaqtalmady.
Ákimdikte jedel shtab qurylyp, jumys isteýde. Oǵan quramyna memlekettik organdar men tótenshe jaǵdaılardyń barlyq qyzmetteri kiredi. Aýdan ákiminiń mindetin atqarýshy Erbolat Rahmetýllın jaǵdaıdy tolyq baqylaýyna aldy.
Oblystaǵy ózenderde jáne sý basýy múmkin ýchaskelerde monıtorıngileý jalǵasýda, jedel shtab táýlik boıy jumys istep jatyr. 
