ShQO-daǵy arheologııalyq qazba jumystary týraly úsh tomdyq kitap jazylady
Búgin Óskemende «Altaı túrki áleminiń altyn besigi» atty halyqaralyq konferentsııa ótti. Onyń barysynda Shyǵys Qazaqstan oblysynyń aýmaǵynda birneshe jyl boıy júrgizilip jatqan arheologııalyq qazba jumystarynyń nátıjesi sóz etildi. Sharaǵa Qazaqstannyń túkpir-túkpirinen arheologtar, ǵalymdar men tarıhshylar qatysty. Sondaı-aq Túrkııa, Ulybrıtanııa, Reseı elderinen arheologtar keldi.
«Óńirdegi qazba jumystary kezinde tabylǵan san túrli jádigerler álem ǵalymdaryn tańǵaldyrýda. Bıyl Kúrshim aýdanyndaǵy obany qazý barysynda at ábzeline arnalǵan altyn áshekeıler tabylǵan bolatyn. Jylqynyń saq taıpasynan shyqqan patshaǵa tıesili bolǵany anyqtalyp otyr. Tarbaǵataı aýdany Eleke sazy alqabyndaǵy qorǵandardyń birinen tabylǵan mýzykant-jaýyngerdiń keskin-kelbetin jáne ejelgi mýzykalyq aspaptardy qalpyna keltirdik», - dedi arheolog Zeınolla Samashev.
Onyń aıtýynsha, byltyr oblysta tabylǵan qundy jádigerler Ulybrıtanııada kórmege qoıylǵan. Endi aldaǵy ýaqytta arheologııalyq qazba jumystary týraly «Qazaqstan tarıhy» atty úsh tomdyq kitap jaryqqa shyqpaq.
«Aldaǵy ýaqytta da qazba jumystaryn jalǵastyramyz. Sheteldik áriptestermen baılanysty nyǵaıtyp jatyrmyz. Máselen, Ulybrıtanııanyń Kembrıdj qalasyndaǵy arheologııalyq ınstıtýt zerthanalaryn paıdalaný úshin kelissózder júrgizilýde. Elimizdegi aǵylshyn tilin biletin stýdentterdi sol jaqqa oqýǵa jiberip, halyqaralyq deńgeıde jumys isteıtin bilikti kadrlardy daıyndaý josparlanýda», - deıdi Zeınolla Samashev.
Konferentsııaǵa elordadan kelgen tarıh ǵylymdarynyń doktory Tursynhan Zákenulynyń aıtýynsha, osyndaı sharanyń tarıhty túgendeýdegi mańyzy zor.
«Altaı jeriniń mádenı-rýhanı dáýirleý kezeńi endi bastalǵandaı. Altaı tóńiregindegi memleketter túrki áleminiń tarıhyna ortaq. Bul bizdi biriktiretin faktor. Shyǵys Qazaqstanda osy konferentsııa aldaǵy jyldarda da ótkizile berse degen tilektemiz. Onyń túrki álemin biriktirýge, mádenıetimizdi damytýǵa tıgizetin paıdasy óte joǵary», - dedi ol.
