ShQO-daǵy Altyn qum jaǵajaıynda qutqarýshylar beketi ashyldy

ÓSKEMEN. QazAqparat – Shyǵys Qazaqstan oblysy Samar aýdanyndaǵy «Altyn qum» jaǵajaıynda qutqarýshylar beketi ashyldy, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, ár 2 apta saıyn munda 4 súńgýir men 3 órt sóndirýshi demalýshylardyń qaýipsizdigin qamtamasyz etedi.

«Bekettiń ashylýyndaǵy basty maqsat – sýdaǵy qaıǵyly oqıǵalardyń aldyn alý jáne jaǵajaı mańynda ornalasqan nysandarda órt bolýyna jol bermeý. Jyl saıyn jaz kezinde qutqarýshylar kúsheıtilgen jumys rejımine kóshedi. Olar qaıyqpen sý aıdynynda baqylaý jasaıdy, al órt sóndirýshiler 110 shaqyrymǵa sozylǵan jaǵalaýda demalýshylar men nysan ıeleri qaýipsizdik erejeleriniń saqtalýyna monıtorıng júrgizedi», - delingen departament aqparatynda.

Sonymen qatar, arnaıy jadnamalar taratylyp, nusqaýlyqtar ótkizilip jatyr.

Jańa qutqarýshylar beketi jumysqa qajetti qutqarý jabdyqtarymen, súńgýirlik kostıýmdermen, júzý jáne basqa da quraldarmen, órt sóndirý avtokóligimen jabdyqtalǵan.