ShQO-daǵy Adaldyq alańy jobasy óz mıssııasyn aıaqtady

ÓSKEMEN. QazAqparat – Shyǵys Qazaqstan oblysyndaǵy jobalyq keńsege 3 jyl ishinde ár túrli máseleler boıynsha 1813 adam júgingen. Olar óz saýaldaryn áleýmettik jeli arqyly da qoıdy. 1749 azamattyń suraǵy oń sheshildi, dep habarlaıdy QazAqparat tilshisi.

«Memleket basshysy Qasym-Jomart Toqaevtyń «Halyq únine qulaq asatyn memleket» tujyrymdamasyn iske asyrý sheńberinde árbir ákimdik jumystyń jańa servıstik modeline kóshti. 4 oblystyq mańyzy bar qala, 15 aýdan jáne 23 aýdandyq mańyzy bar qala, kent, aýyldyq okrýgterde «Ashyq ákimdik» keńseleri ashyldy. Bul jumystar sátti júzege asyryldy deýge bolady. Qazirgi tańda barlyq keńseler azamattarǵa «bir tereze» qaǵıdaty boıynsha qyzmet kórsetedi», - deıdi ShQO ákimi apparatynyń №4 Úlgilik bazalyq baǵyty boıynsha joba ákimshisi Dýman Kenjeǵazın.

Oblystaǵy barlyq qala, aýdandarda ákimderdiń sybaılas jemqorlyq máseleleri boıynsha shtattan tys keńesshileri taǵaıyndalyp, turǵyndarmen baılanys kúsheıtildi.

Osy ýaqytqa deıin túrli salalar boıynsha jemqorlyqtyń aldyn alýǵa baǵyttalǵan 3,5 myńǵa jýyq qoǵamdyq monıtorıng júrgizdi. Onyń qorytyndysy boıynsha jaýapty memlekettik organdarǵa 3 myńnan astam usynystar berilgen. Búgingi tańda bul usynystardyń 93%-ten astamy oryndaldy.

Oblys boıynsha sybaılas jemqorlyqqa qarsy mádenıet qalyptastyrý jáne profılaktıkalyq sharalar júrgizý úshin 182 memlekettik mekemeniń ujymymen jáne 89 eldi meken halqymen kezdesýler uıymdastyrylǵan.

«Shyǵys - Adaldyq alańy» jobalyq keńsesi 2019 jyly qurylǵan. Endigi kezekte jumysyn toqtatyp, qyzmetin jobalyq basqarýdyń úlgilik bazalyq baǵytyna sáıkes jalǵastyrady.

Esterińizge sala ketsek, osyǵan deıin Semeıde jastardy baspanamen qamtý úshin «Abaı jastary» jobasy iske asyrylatynyn habarlaǵan edik.