ShQO-daǵy 59 eldi mekende sý basý qaýpi joıyldy - QR TJM

ÓSKEMEN. QazAqparat – Shyǵys Qazaqstan oblysyndaǵy 59 eldi mekende sý basý qaýpi joıyldy. Bul týraly búgin óńir jurtshylyǵymen kezdesken QR Tótenshe jaǵdaılar vıtse-mınıstri Marat Kúldikov málim etti, dep habarlaıdy QazAqparat tilshisi.

Shyǵys Qazaqstan oblysyndaǵy eń ózekti máselelerdiń biri – kóktem kezinde eldi mekenderdi sý basýy. Óńir boıynsha sý qorǵaý aımaǵynda ornalasqan 34 eldi mekende 4260 turǵyn úı bar.

«Sý tasqyny kezeńindegi máselelerdi sheshý úshin Úkimet deńgeıinde – 2023 jylǵa deıingi jol kartasy, al oblystar deńgeıinde – óńirlerdi damytý josparlary bekitilgen. Sonyń nátıjesinde, Shyǵys Qazaqstan oblysynda 13 624 adam turatyn 59 eldi mekende sý basý qaýpi joıyldy», - dedi Marat Kúldikov.

Onyń aıtýynsha, qazir tek 12 aýylda sý basý qaýpi saqtalýda.

«Atap aıtqanda, Glýbokoe aýdanynda – 8, Tarbaǵataı aýdanynda – 3, Altaı aýdanynda – 1 aýyl. Ondaǵy 416 úıde jalpy sany 1163 adam turady. Sý tasqyny kezeńinde halyqtyń qaýipsizdigin qamtamasyz etý úshin jergilikti atqarýshy organdardan jol kartasynyń ýaqtyly oryndalýyn qamtamasyz etýdi suraımyn», - dedi QR Tótenshe jaǵdaılar vıtse-mınıstri.