ShQO-daǵy 20 eldi mekende sý basý qaýpi joıyldy
ÓSKEMEN. QazAqparat – Shyǵys Qazaqstan oblysyndaǵy 20 eldi mekende sý basý qaýpi joıyldy, dep habarlaıdy QazAqparat tilshisi.
ShQO TJD baspasóz qyzmetiniń málimetine súıensek, oblys ákiminiń orynbasary Nurjan Jumadilovtiń tóraǵalyǵymen tótenshe jaǵdaılardyń aldyn alý jáne joıý jónindegi oblystyq komıssııanyń kezekti otyrysy ótti. Jıyn barysynda sý tasqynyna qarsy qolǵa alynǵan sharalardyń iske asyrylý barysy sóz etildi.
«Búginde aımaqtaǵy qar jamylǵysynyń bıiktigi 7-den 77 sm-ge deıin jetedi. 2021-2023 jyldarǵa sý tasqynyna qarsy is-sharalardyń jol kartasy sheńberinde jalpy somasy 162 mln teńgege 11 shara iske asyrylǵan. Jalpy oblys boıynsha 108 eldi mekendi sý basý qaýpi bar. Qazir 20 aýylda sý basý qaýpi joıylyp, 69-y úshin barynsha azaıtyldy», - delingen aqparatta.
Qazirgi ýaqytta kóktemgi sý tasqynyna daıyndyq aıasynda aýdandarda qar shyǵarý jumystary júrgizilýde. Kanaldar men aryqtardy, sý ótkizý qurylystary men kópirlerdi tazalaý jumystary qolǵa alynǵan. 6 myń tonna ınertti materıal qory, 85 myń dana ydys-qap daıyndaldy.
1 aqpannan bastap óńir aýmaǵynda joǵary daıyndyq rejımi engizildi. Jeke quramnan 3000 adam, 2 myń tehnıka jáne 200 motopompa saqadaı saı.
