ShQO-daǵy 15 ýchaskede muz jarý jumystary júrgizildi
ÓSKEMEN. QazAqparat – Shyǵys Qazaqstan oblysyndaǵy 15 ýchaskede muz jarý jumystary júrgizildi, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, departament mamandary sý tasqynynyń aldyn alý maqsatynda birqatar sharalardy qolǵa alýda. Atap aıtqanda, oblys ózenderindegi qaýipti sanalatyn 15 ýchaskede muz jarý jumystary júrgizilgen.
«Bul joly muz jarý jumystary Kúrshim men Katonqaraǵaı aýdandarynda júrgizildi. Osy jerlerde jyl saıyn muz keptelip, jaǵalaýlardy sý basatyn. Osyǵan jol bermeý úshin qutqarýshylar aldyn ala muzdy usaqtatty. Eń birinshi shuńqyr qazylady. Oǵan shamamen bes mınýt ýaqyt ketedi. Sodan keıin jarylǵysh zat salynady. Qaýipsizdik maqsatynda bul oryndarǵa eshkim jolatylmaıdy», - delingen habarlamada.
Muz jarý kezinde 13851 sharshy metr aýmaq qamtylǵan. Barlyǵy óńirdegi 18 qaýipti ýchaskeniń 15-inde jarý jumystary júrgizildi. Muz qalyńdyǵy – 70-90 sm.
Departament mamandarynyń aıtýynsha, Shyǵys Qazaqstandaǵy kóktemgi sý tasqyny ádette naýryzdyń ekinshi onkúndiginen bastap maýsymnyń ekinshi onkúndigine deıin jalǵasady.
