ShQO-daǵy 146 muzdaq kólge tikushaqpen barlaý júrgizilýde

ÓSKEMEN. QazAqparat – Shyǵys Qazaqstan oblysynda muzdaq kólderge tikushaqpen barlaý júrgizilýde, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, óńirde 146 muzdaq kól bar. Qyrkúıek aıynyń sońyna deıin bul kólder qatyp qalmaıynsha, «Qazseldenqorǵaý» ShQOF mamandary men TJD qyzmetkerleri baqylaý júrgizedi. Sondaı-aq Altaı, Zaısan, Katonqaraǵaı, Tarbaǵataı, Úrjar aýdandaryndaǵy jáne Rıdder qalasyndaǵy sel qaýpi bar ýchaskeler únemi baqylaýda.

Jýyqta «Qazavıaqutqarý» AQ tikushaǵymen muzdaq kólderge, Altaı aýdanyndaǵy Turǵusyn ózeni basseınine, Rıdder qalasyndaǵy Gromotýha, Belaıa Ýba ózenine jáne Katonqaraǵaı aýdanynyń Sarymsaqty, Berel, Buqtyrma ózenine aerovızýaldy zertteý júrgizilgen. Belgili bolǵandaı, taý jotalarynda qar jamylǵysy joq. Tek soltústik betkeılerde azdaǵan qar baıqalady.

«Oblystaǵy sel, sý tasqyny jáne kóshkin jaǵdaıy turaqty. Zerttelgen kólder eldi mekenderge, sharýashylyq obektilerge esh qaýip tóndirmeıdi» – dedi ShQO TJD Tótenshe jaǵdaılardyń aldyn alý basqarmasynyń bastyǵy Alekseı Shtykel.