ShQO-daǵy jaǵajaılar shomylý maýsymyna áli tolyq daıyn emes

ÓSKEMEN. KAZINFORM – Shyǵys Qazaqstan oblysynda shomylý maýsymy 1 maýsymda resmı túrde bastalady. Alaıda jaǵajaılar áli maýsymǵa tolyq daıyn emes. 

Óńir boıynsha sýǵa túsýge ruqsat etilgen 25 ýchaske belgilengen. Oblystyq máslıhat sessııasynyń sheshimimen shomylýǵa tyıym salynǵan 74 jáne shaǵyn kólemdi kemelerde júzýge tyıym salynǵan 29 oryn bar.

ShQO TJD málimetine súıensek, kópshilikke arnalǵan sý aıdyndarynda sý túbin tekserý, qalqyma belgiler ornatý, baqylaý munarasyn qoıý jáne arnaıy oqytylǵan qutqarýshylardyń kezekshiligi qamtamasyz etilýi tıis.

— Ótken shomylý maýsymynda oblys sý aıdyndarynda departament qyzmetkerleri 23 adamdy, onyń ishinde 4 balany qutqardy. Ruqsat etilmegen jerlerde shomylǵan 4 adam sýǵa batyp ketti, onyń bireýi bala. Balalar lagerleri men demalys bazalarynyń ıeleri shomylý maýsymy bastalǵanǵa deıin olardy talapqa sáıkes keltirýi qajet, — delingen aqparatta.

Osy rette, qutqarýshylar halyqqa shomylý úshin tek jabdyqtalǵan jaǵajaılardy tańdaýǵa, sý aıdyndaryndaǵy tyıym salý belgilerine nazar aýdarýǵa shaqyrdy.

— Qazirgi tańda barlyq talapqa tolyqtaı saı keletin jaǵajaılardyń sany az. Jaǵajaı ıelerinde maýsymǵa daıyndalý úshin eki aptadan az ýaqyt qaldy, — deıdi TJD azamattyq qorǵanys basqarmasynyń bastyǵy Dáýren Aǵajaev.

Eske salsaq, osyǵan deıin Óskemende sýǵa batyp bara jatqan 5 jasar balany qutqarǵan stýdent marapattalǵany habarlanǵan.