ShQO-daǵy túrmede dárigerlerge negizsiz tólemder jasalǵan – prokýratýra

ÓSKEMEN. KAZINFORM – Shyǵys Qazaqstan oblysy Shemonaıha aýdanynda prokýratýra qyzmetkerleri túrmede dárigerlerge negizsiz tólemder jasalǵanyn anyqtady. 

Aýdan prokýratýrasy ShQO boıynsha QAJ departamentiniń № 18 túzetý mekemesine tekserý júrgizdi. Sonyń barysynda sottalǵandarǵa medıtsınalyq qyzmet kórsetý jumystarynyń negizsiz kóbeıtilip kórsetilgendigi belgili boldy.

— Máseleg, hırýrg mekemege josparly sapary kezinde 15 sottalǵandy teksergen. Alaıda eseptik qujattarda qabyldaýda 160 adamnyń bolǵany kórsetilgen. Osy derekter negizinde dárigerge 214 myń teńge mólsherinde jalaqy eseptelgen. Alaıda bekitilgen normatıvterge sáıkes, 15 naýqasty qabyldaǵany úshin tólenetin soma 15 252 teńgeni quraýy tıis edi, — delingen aqparatta.

Dál osyndaı jaǵdaı dermatovenerolog, narkolog, nevropatolog jáne psıhıatr dárigerleriniń qabyldaýlarynda da boldy. Osylaısha, dárigerlerge artyq tólengen aqshanyń jalpy mólsheri 1,4 mln teńgeni qurady.

— Prokýrorlyq qadaǵalaý aktisi negizinde zańsyz tólengen qarjy bıýdjetke qaıtaryldy. Al kináli tulǵalar tártiptik jaýapkershilikke tartyldy, - delingen habarlamada. 

Eske salsaq, buǵan deıin «Bıpek-Avto» isi boıynsha sot úkimi shyqqany habarlanǵan.