ShQO-daǵy tórt týrıstik aýdanda áli kúnge deıin qoqys polıgony joq
ÓSKEMEN. KAZINFORM – Shyǵys Qazaqstan oblysynda týrıster jıi baratyn tórt aýdanda qatty turmystyq qaldyqtarǵa arnalǵan polıgon áli kúnge deıin salynbaǵan.
Bul másele QR Ekologııa jáne tabıǵı resýrstar mınıstri Erlan Nysanbaevtyń qatysýymen ótken jıyn barysynda kóterildi.
Shyǵys Qazaqstan oblysy ákimdigi baspasóz qyzmetiniń málimetinshe, búginde Katonqaraǵaı, Kúrshim, Samar jáne Marqakól aýdandarynda qatty turmystyq qaldyqtar polıgony joq. Bul aýdandar jyl saıyn myńdaǵan týrısti qabyldaıdy.
Erlan Nysanbaev máseleni sheshýdi aldymen Katonqaraǵaı aýdanynan bastaýdy usyndy.
- Biz pılottyq jobany júzege asyrýǵa qoldaý kórsetýge daıynbyz. Polıgon qurylysyna jyldyq mólsherlemesi 3 paıyz bolatyn, 15 jylǵa deıingi merzimge jeńildetilgen nesıe alý múmkindigi qarastyrylǵan, - dedi mınıstr.
Óńir ákimdiginiń málimetinshe, qaldyqtardy basqarýdyń zamanaýı júıesin qalyptastyrý týrıstik aýmaqtardy damytý úshin asa mańyzdy.
- Bul máseleni keshendi túrde sheshý oblystaǵy ekologııalyq ahýaldy jaqsartýǵa, qorshaǵan ortanyń sapasyn arttyrýǵa jáne óńirdiń turaqty damýyn qamtamasyz etýge múmkindik beredi, - delingen aqparatta.
Eske salsaq, osyǵan deıin Óskemende plastıkti qaıta óńdeıtin mobıldi stantsııa iske qosylatyndyǵy habarlanǵan.
