ShQO-daǵy toǵyz kásiporyn 304 jumysshysyna 150 mln teńge qaryz
ÓSKEMEN. KAZINFORM – Shyǵys Qazaqstan oblysyndaǵy toǵyz kásiporyn 304 jumysshysyna 150 mln teńge jalaqy tólemegen.
Eńbek memlekettik ınspektsııasy komıteti ShQO boıynsha departamentiniń málimetine súıensek, eńbek ınspektorlary ótken jyly kásiporyndarǵa 405 tekseris júrgizip, 1322 zańbuzýshylyqty anyqtaǵan.
- Olardyń basym bóligi eńbek qatynastary men eńbek qaýipsizdigine qatysty boldy. Osyǵan baılanysty 143 uıǵarym shyǵarylyp, kásiporyndarǵa 35,1 mln teńge kóleminde aıyppul salynǵan. Búginde oblystaǵy 9 kásiporynnyń 304 jumysshysy jalaqylaryn ala almaı júr. Kompanııalardyń óz qyzmetkerlerine qaryzy 149,9 mln teńgege jetken, - deıdi departament basshysy Baqytbek Qızatov.
Sońǵy bir jylda oblysta 106 óndiristik jazataıym oqıǵa tirkeldi. Bul aldyńǵy jylmen salystyrǵanda 8,1%-ǵa kóp. Barlyǵy 17 adam qaza taýyp, 66 jumysshy aýyr jaraqat aldy.
Oqıǵalardyń negizgi sebepteri – qyzmetkerlerdiń óreskel qatelikteri men jumys jaǵdaılaryn uıymdastyrýdyń qanaǵattanarlyqsyz deńgeıi.
Eske salsaq, buǵan deıin 2024 jyly iri kásiporyndardyń zııandy shyǵaryndylary 6% azaıǵany habarlanǵan.