ShQO-daǵy Terektibulaq aýylynyń turǵyndary ınternettiń tek qaǵaz júzinde ustaıtynyna shaǵymdandy
ÓSKEMEN. KAZINFORM – Shyǵys Qazaqstan oblysy Kúrshim aýdany Terektibulaq aýylynyń halqy ınternet jyldamdyǵynyń tym baıaý ekendigin aıtyp, narazylyq bildirdi. Sonyń saldarynan ınternetke kirý úshin tereze jaǵalap, ústeldiń ústine shyǵyp, áýre-sarsańǵa túsýde.
«Daýys estilmeı, yǵyrdy shyǵardy»
Terektibulaq - Kúrshim aýdany Abaı aýyldyq okrýgi quramyndaǵy aýyl. Búginde eldi mekende 336 adam turady. Sol halyq ınternet jyldamdyǵynyń baıaýlyǵyna narazy.
- El qatarly ınternette otyra almaımyz. Sonyń saldarynan halyq jappaı qalaǵa bet burmaǵanda qaıtedi? Bylaısha aıtqanda, ınternet tek qaǵaz júzinde ustap tur. Internetke qosylý úshin únemi tereze jaǵalap, ústeldiń ústine shyǵyp júremiz. Ol az degendeı, tipti uıaly telefonmen durys sóılese de almaımyz. Tutqanyń ar jaǵyndaǵy adamnyń daýysy estilmeı, yǵyrdy shyǵardy, - deıdi aýyl turǵyndary.
Olardyń kóbi ınternetke «Qazaqtelekom» AQ arqyly qosylyp otyrǵandyqtaryn jetkizdi.
- Aı saıynǵy tólem de sharyqtap barady. Mysaly, maǵan ótken aıda 16 myń teńgeniń túbirtegi keldi. Ne degen baǵa bul?! Al sapasy syn kótermeıdi. Osy máseleni sheshýge bola ma?, - deıdi Kamash Taýpıqova.
Bıyl baılanys jelisi tartylmaq
Kazinform redaktsııasynyń resmı saýalhatyna jaýap bergen Kúrshim aýdany ákiminiń orynbasary Qaırat Ázimbaev jergilikti bıliktiń bul máseleden habardar ekendigin málim etti.
- Terektibulaq aýylynda ınternet jelisiniń ótkizý qabilettiligi tómen. Naqty aıtqanda, 2G (Altel - 9,4 mbıt/s). Uıaly baılanys ta nashar (Daýystyq baılanys: Beeline-0,65; Tele2-0,98; Kcell-0,600,70). 2024 jyly aýyldaǵy orta mektepke «Starlink» spýtnıgi ornatyldy. 2025 jyly Tsıfrlyq damý, ınnovatsııalar jáne aeroǵarysh ónerkásibi mınıstrligimen memorandým negizinde qoljetimdi ınternet ulttyq jobasy aıasynda talshyqty optıkalyq baılanys jelisin tartý josparlanýda, - deıdi ol.
Qaırat Ázimbaevtyń aıtýynsha, Terektibulaq aýylynda 2026 jylǵa deıin «Mobaıl Telekom-Servıs» JShS arqyly Tele2 baılanysyna antenna-machtalyq qurylǵy ornatý jumystary júrgiziledi.
- Jalpy Kúrshim aýdanynyń ınternet jelisiniń ótkizý qabilettiligi 3 aýylda jaqsy (8-den joǵary mbıt/s). Olar Kúrshim, Aqsýat, Quıǵan aýyldary. Baraq batyr aýylynda ınternet jelisiniń ótkizý qabilettiligi ortasha (2-5 mbıt/s). 10 aýylda nashar (0,5-2 mbıt/s). Bul Topterek, Alǵabas, Býrabaı, Terektibulaq, Jolnusqaý, Qaratoǵaı, Maraldy, Úshbulaq, Birlik, Saryóleń aýyldary. Qalǵan Qoıtas, Amanat, Aqshı, Egindibulaq, Qaıyńdy, Qaınar, Qystaý-Kúrshim aýyldarynda ınternet múldem joq. Byltyr Amangeldi aýylynyń soltústik-batysyna qaraı 7,3 km bıiktikte 40 metrlik antenna-machtalyq qurylǵy, Egindibulaq aýylynyń soltústik-shyǵysyna qaraı 15 km bıiktikte 35 metrlik antenna-machtalyq qurylǵy, Jolnusqaý aýylynda 30 metrlik antenna-machtalyq qurylǵy ornatyldy. Sondaı-aq qazirgi ýaqytta Úshbulaq aýylynan batysqa qaraı 5,4 km jerde bıiktigi 40 metrlik antenna-machtalyq qurylǵy salý jumystary júrgizilip jatyr, - deıdi aýdan ákiminiń orynbasary.
Eske salsaq, buǵan deıin Básekelestikti qorǵaý jáne damytý agenttiginiń Astana qalasy boıynsha departamenti Beeline uıaly baılanys operatorynyń ınternet baǵasyn qoldan kótergenin anyqtaǵany habarlanǵan.