ShQO-daǵy taýly jerlerde qar kóshkini júrý qaýpi tekserildi
ÓSKEMEN. KAZINFORM — Shyǵys Qazaqstan oblysynda joldar boıyndaǵy qar kóshkini qaýpi bar ýchaskelerge tekserý júrgizildi.
Jyl basynan beri oblys aýmaǵynda qubylmaly aýa raıyna baılanysty «Qazseldenqorǵaý» ShQ fılıalynyń qyzmetkerleri «Óskemen-Altaı» jolynyń qar kóshkini qaýpi joǵary ýchaskelerinde, «Pýtıntsevo» jáne «Bogatyrevo» ýchaskelerinde, oblystyq mańyzy bar «Óskemen-Samar» jolynyń «Taıynty», «Laıly» ýchaskelerinde jáne Taýly Úlbi baǵyty boıynsha qar oshaqtaryna tekserý júrgizdi.
Baqylaý nátıjesinde qar kóshkini jınalatyn oshaqtardaǵy qar jamylǵysynyń tyǵyz ornyqqany anyqtaldy.
— Qar jamylǵysynyń qalyńdyǵy Altaı aýdanynda shamamen — 70 sm, Katonqaraǵaı aýdanynda — 50 sm, Samar aýdanynda — 35–45 sm quraıdy. Qar kóshkininiń ózdiginen túsý qaýpi tómen, — delingen ShQO TJD baspasóz qyzmeti taratqan aqparatta.
Mamandar qar kóshkini qaýpi joǵary aımaqtarda ornalasqan eldi mekender men demalys oryndarynda profılaktıkalyq túsindirý jumystaryn júrgizdi. «Qazseldenqorǵaý» ShQ fılıalynyń qyzmet kórsetetin aýmaqtarynda barlyǵy 325 qar kóshkini oshaqtary bar. Onda 93 shaqyrym avtojol, mereke jáne demalys kúnderi 3000-nan astam demalýshyny qabyldaıtyn týrıstik jáne shańǵy bazalary ornalasqan.
Eske salsaq, buǵan deıin Shyǵys Qazaqstanda boranda qalǵan 3 balyqshy qutqarylǵany habarlanǵan.