ShQO-daǵy taýly jerlerde qar kóshkini júrý qaýpi bar
ÓSKEMEN. KAZINFORM — Shyǵys Qazaqstan oblysyndaǵy taýly jerlerde 15 qarashadan bastap qar kóshkini júrýi múmkin.
ShQO tótenshe jaǵdaılar departamenti baspasóz qyzmetiniń málimetine súıensek, óńirde qar kóshkini júrý qaýpi bar.
«15 qarashadan bastap meteorologııalyq jaǵdaıdyń ózgerýine, jıi qar jaýýyna jáne jeldiń kúsheıýine baılanysty oblystyń taýly jerlerinde qar kóshkini túsýi yqtımal. Osy rette, turǵyndarǵa barynsha abaı bolýdy, eshbir jaǵdaıda taýǵa shyqpaý qajettigin eskertemiz», — dep habarlady vedomstvo ókilderi.
Eger qandaı da bir qıyndyqqa tap bolsańyzdar, birden «112» nómirine qońyraý shalyńyz.
Sondaı-aq qutqarýshylar óńir jurtshylyǵyna alys saparǵa shyǵar aldynda joldardyń jaı-kúıin «Dármen» mobıldi qosymshasy arqyly tekserip otyrýǵa keńes berdi.
Eske salsaq, osyǵan deıin Rıdderde tabıǵattyń tosyn minezinen keıin halyq birneshe kún boıy sýsyz qalǵany habarlanǵan.
