Katonqaraǵaı ulttyq parkinde shyqqan órt aýyzdyqtaldy
ASTANA. KAZINFORM — Shyǵys Qazaqstan oblysynyń Katonqaraǵaı aýdanyndaǵy jetýi qıyn taýly aýmaqta shyqqan tabıǵı órt 3,7 gektar aýmaqta oqshaýlandy. Qazir órttiń byqsyp jatqan jekelegen oshaqtaryn tolyq sóndirý jáne aýmaqty baqylaý jumystary jalǵasyp jatyr.
Ekologııa jáne tabıǵı resýrstar mınıstrliginiń málimetinshe, órt Katonqaraǵaı memlekettik ulttyq tabıǵı parkiniń Aqsý fılıalyna qarasty Aqsý ormanshylyǵy aýmaǵynda tirkelgen. Jalyn teńiz deńgeıinen 1 400 metrden astam bıiktiktegi betkeıde orman tósemesin, butaly ósimdikter men jel qulatqan aǵashtardy sharpyǵan.
Mamandardyń aıtýynsha, jer bederiniń kúrdeliligi, tik jartastar men kirme joldardyń bolmaýy órtti sóndirý jumystaryn edáýir qıyndatqan.
— Órtti aýyzdyqtaýǵa Ekologııa jáne tabıǵı resýrstar mınıstrligi, Tótenshe jaǵdaılar mınıstrligi, jergilikti atqarýshy organdar, «Qazavıaormanqorǵaý» mekemesiniń kúshteri, sondaı-aq TJM men oblys ákimdiginiń avıatsııasy jumyldyryldy. Oqıǵa ornynda jedel shtab qurylyp, jumysty ShQO TJD bastyǵy Rashıd Blıalov pen Katonqaraǵaı memlekettik ulttyq tabıǵı parkiniń bas dırektory Janbolat Tynybekov úılestirip otyr, — dep habarlady Ekologııa mınıstrliginiń baspasóz qyzmeti.
Órt oshaqtaryna sý tógý qurylǵysymen jabdyqtalǵan tikushaq 14 márte ushyp, jalpy kólemi 27 myń lıtr sý tókti. Sonymen qatar órt aýmaǵyna tikushaqtar arqyly jalpy syıymdylyǵy 8 tonna bolatyn sý saqtaıtyn ydystar jetkizildi. Bul tabıǵı sý kózderi joq aımaqta jerústi kúshteriniń úzdiksiz jumys isteýine múmkindik bergen.
Jumyldyrylǵan barlyq qyzmetterdiń úılesimdi is-qımyly men avıatsııanyń qoldaýynyń nátıjesinde tabıǵı órt 3,7 gektar aýmaqta oqshaýlandy. Qazirgi ýaqytta byqsyp jatqan jekelegen oshaqtardy tolyq sóndirý jáne jaǵdaıdy turaqty baqylaý jumystary jalǵasyp jatyr.
Eske salaıyq, buǵan deıin Katonqaraǵaı ulttyq parkinde shyqqan órtti aýyzdyqtaýǵa tikushaqtar tartylǵanyn habarlaǵanbyz.
