ShQO-daǵy tasjoldardyń biri erteńge deıin jabyq bolady
ÓSKEMEN. KAZINFORM — Shyǵys Qazaqstan oblysynda qar kóshkini qaýpine baılanysty joldardyń biri jabyldy.

ShQO Tótenshe jaǵdaılar departamenti baspasóz qyzmetiniń málimetine súıensek, Katonqaraǵaı aýdanyndaǵy tasjoldardyń birinde qar kóshkini júrý qaýpi artty.
— Soǵan baılanysty jergilikti mańyzy bar «Sogornoe-Barlyq» tasjolynyń 1-25 shaqyrymynda 8 naýryz saǵat 08.00-ge deıin kóliktiń barlyq túri úshin qozǵalysqa tyıym salyndy. Kólik júrgizýshilerin óz marshrýttaryn aldyn ala josparlap alýdy suraımyz, — delingen aqparatta.
Osyǵan deıin óńir qutqarýshylary taýly jerlerde qar kóshkini túsýi qaýpi joǵary ekendigin eskertken. Buǵan kúnniń kúrt jylytyp, qardyń jyldam erı bastaýy sebep bolyp otyr.
Eske salsaq, Shyǵys Qazaqstanda eki márte qar kóshkini túsirilgeni habarlanǵan.