ShQO-daǵy tas kóshkininen keıin respýblıkalyq mańyzdaǵy joldardyń qaýipti taý betkeıleri tekserilmek

ÓSKEMEN. KAZINFORM — Shyǵys Qazaqstan oblysyndaǵy Óskemen-Altaı-Katonqaraǵaı-Rahman qaınarlary tasjolynyń boıynda taý jynystarynyń qulaýyna baılanysty respýblıkalyq mańyzy bar joldardyń taýly ýchaskelerine vızýaldy tekserý júrgiziledi.

tas kóshkini
Foto: Vıdeodan alynǵan skrın

Tas kóshkininiń qulaýyna atalǵan joldyń 25-shaqyrymynda bolǵan uzaqqa sozylǵan ári tolassyz jaýyn-shashyn sebep bolýy múmkin. Ylǵal taý jynystaryndaǵy tereń jaryqtarǵa sińip, tastardyń salmaǵyn arttyrǵan.

Buǵan qosa, sý aǵyndary taý betkeıiniń tabanyn shaıyp, topyraqtyń usaq bólshekterin aǵyzyp ketken. Aqyrynda iri tas kesekteri opyrylyp, joldyń júris bóligine qulady. Mamandar kóshkinniń eń yqtımal sebebi osy dep otyr.

Oqıǵadan keıin áleýmettik jelilerde qyzý talqylaý bastaldy. Halyq kýágerlerge kólikterin toqtatyp, ózge júrgizýshilerge kedergi keltirmeý úshin joldaǵy usaq tastardy óz betterinshe tazalaýǵa keńes bergen. Alaıda jol salasyna jaýapty mekeme basshylyǵy mundaı áreketti adam ómirine tónetin úlken qaýip dep sanaıdy.

— Eger jolda tas qulaǵanyn baıqasańyz, qaýipsiz qashyqtyqta toqtap, táýlik boıy jumys isteıtin 1403 baılanys ortalyǵyna habarlasyp, qaýip týraly málimdeńiz. Jalpy, tasjoldarda patrýldik baqylaý turaqty júrgiziledi. Júrgizýshilerge kólikten shyqpaı, joldy óz betinshe tazalaýǵa áreket jasamaýǵa keńes beremiz. Óıtkeni kez kelgen sátte tastar qaıta qulaýy múmkin. Qazir qaýipti taýly betkeılerdiń barlyǵyna vızýaldy tekserý júrgizýdi josparlap otyrmyz, — deıdi «QazAvtoJol» UK» AQ ShQO fılıalynyń dırektory Nurbek Temirhanov.

Eske salsaq, buǵan deıin ShQO-da respýblıkalyq mańyzy bar joldyń bir bóligin tas kóshkini basyp qalǵany habarlanǵan.