ShQO-daǵy Shemonaıha qalasynda myńdaǵan úı 1 mamyrdan bastap gazsyz qalaıyn dep tur

ÓSKEMEN. KAZINFORM — Shyǵys Qazaqstan oblysy Shemonaıha qalasynda kelesi aıdan bastap kópqabatty úılerdegi gaz óshiriledi. 

1 mamyrdan bastap «PKF Kapan» JShS Shemonaıha aýdanynyń ortalyǵyndaǵy kópqabatty úılerge gaz berýdi toqtatady. Oǵan sebep — jabdyqtyń tozýy.

Belgili bolǵandaı, gaz qysymyn rettegishterdiń odan ári jumys isteýi qaýipti dep tanylǵan. 2024 jyldyń kúzinde júrgizilgen tehnıkalyq baıqaý kezinde talaı aqaý anyqtaldy. «Grýppa kompanıı AS-AL» JShS sarapshylary júıeniń eskirip ketkendigin málim etken. Sondyqtan kompanııa ákimdikke 2025 jyldyń 1 mamyrynan bastap jabdyqty tolyǵymen aýystyrý qajettigi jaıly habarlaǵan.

Barlyǵy qaladaǵy 91 kópqabatty úıdiń 37-sine nemese 2 535 páterge gaz berý toqtatylady. Máselege qatysty Shemonaıha aýdanynyń ákimi Dıdar Keńesbaev túsinikteme berdi.

— Halyq gazdy óshirmeýdi surap jatyr, biraq biz táýekelge bara almaımyz. Jazdaǵy ystyq aýa raıynda qaýip odan saıyn arta túsedi. Biz «PKF Kapan» JShS-dan gazdy óshirip qana qoımaı, búkil júıeni: gaz ustaǵyshtardan bastap ishki qondyrǵylarǵa deıin tolyqtaı dıagnostıkalaýdy usyndyq, — deıdi ol.

Ákimniń aıtýynsha, barlyq jabdyqtyń tozyǵy jetpegeni anyqtalsa, ishinara jóndeýdi qarastyrýǵa bolady. Qazir jergilikti bılik táýelsiz sarapshylardy irikteý boıynsha konkýrs ótkizý úshin qujattardy jınap jatyr.

— Qorytyndy shyqqan kezde bul jumystardyń qanshaǵa baǵalanatyny, bıýdjette oǵan qarjynyń bar-joǵy belgili bolady. Ázirge eshteńe aıta almaımyz, — deıdi Dıdar Keńesbaev.

Eske salsaq, osyǵan deıin Aqtóbede elektr qýaty men gaz baǵasy ózgergeni jaıly jazǵanbyz.