ShQO-daǵy shekaralyq aýdannyń 10 aýylynda áli kúnge deıin uıaly baılanys durys ustamaıdy

ÓSKEMEN. KAZINFORM — Shyǵys Qazaqstan oblysy Marqakól aýdanynyń turǵyndary ınternet pen uıaly baılanys máselesiniń áli sheshilmeı kele jatqanyna narazy. Qazirgi ýaqytta 1,2 myńǵa jýyq adam turatyn 10 eldi mekende uıaly baılanys birde ustap, birde ustamaı qalady.

— Uıaly baılanysqa qatysty shaǵymdar Jańaaýyl, Oń jaq Qaljyr, Urunhaıka, Qaınarly, Bulǵartabyty, Aqjaılaý, Teriskeı-Bókenbaı, Balyqtybulaq, Shaǵanatty jáne Kúngeı-Bókenbaı aýyldarynan túsip otyr. Bul másele kezeń-kezeńimen sheshilmek. Baılanys operatorlarymen birlesip, 2027 jyldyń sońyna deıin baılanysty tolyq retke keltirý kózdelip otyr, — dep habarlady oblys ákimdiginen. 

Aýyl turǵyndary baılanystyń bolmaýy kúndelikti ómirde aıtarlyqtaı kedergi keltiretinin jetkizdi. 

— Bizdiń Shaǵanatty aýylynda ınternet tek keı jerlerde ǵana ustaıdy. Balalarǵa qashyqtan oqý qıyn, dárigerlerge habarlasý nemese týǵan-týyspen baılanysqa shyǵý da ońaı emes, — deıdi jergilikti jurt.

Qazirgi tańda aýdan halqynyń 82,4 paıyzy ınternetpen qamtylǵan. 2025 jyldyń naýryz aıynda Kar-Tel kompanııasy Sheńgeldi jáne Igilik aýyldaryn mobıldi ınternetke qosty.
Bilim salasynda balamaly tehnologııalar qoldanylyp jatyr. Naqty aıtqanda, aýdandaǵy 12 mektepke joǵary jyldamdyqty ınternetpen qamtamasyz etetin Starlink spýtnıktik baılanys júıesi ornatylǵan.

Sonymen qatar respýblıkalyq mańyzy bar jol boıynda da uıaly baılanystyń joqtyǵy kópti tolǵandyryp otyr. Bul turǵyndardan bólek týrısterge de qolaısyz. Ákimdiktiń málimetinshe, jol boıyna antenna-machtalyq qurylymdar ornatý úshin jobalyq-smetalyq qujattama ázirlenip jatyr.

Eske salsaq, osyǵan deıin Qytaı jańa top ınternet-spýtnıkterin ushyrǵany habarlanǵan.