ShQO-daǵy respýblıkalyq tasjoldarǵa stroboskoptar ornatylyp jatyr
ÓSKEMEN. KAZINFORM — Shyǵys Qazaqstan oblysynda jol-kólik oqıǵalary jıi tirkeletin ýchaskelerge jaryq sıgnaldaryn beretin stroboskoptar ornatyla bastady.
Bul shara «Qaýipsiz jol» jedel-aldyn alý sharasy aıasynda júzege asyrylyp jatyr.
Oblystyq Polıtsııa departamentiniń baspasóz qyzmetinen habarlaǵandaı, qazirdiń ózinde respýblıkalyq mańyzǵa ıe tasjoldardyń 12 ýchaskesine stroboskoptar ornatylǵan. Mundaı qurylǵylar júrgizýshilerdiń nazaryn qaýipti aımaqtarǵa aýdarýǵa jáne jol qozǵalysy erejelerin saqtalýyna sep bolady. Ásirese jol kórinýi nasharlaǵan jaǵdaıda olardyń tıimdiligi joǵary.
— Stroboskoptar ornatylatyn oryndar sońǵy jyldardaǵy jol-kólik oqıǵalaryna júrgizilgen taldaý negizinde tańdaldy. Bul — uzaq aınalma joldar, tik eńister men jol kórinýi shektelgen aýmaqtar, — dep habarlady departamenttiń baspasóz qyzmetinen.
Júrgizýshiler bul bastamany qoldap aıtyp otyr.
— Óskemen-Altaı arasyndaǵy jolmee apta saıyn júremin. Osyndaı qurylǵylar ásirese túngi ýaqytta aýadaı qajet. Biraq jol shuryq tesik bolsa, ony aınalyp ótý úshin qarsy jolaqqa shyǵý qajet bolady. Mundaıda eshqandaı stroboskop kómektespeıdi, — deıdi oblys turǵyny Raýan Qalıev.
Eske salsaq, osyǵan deıin Shyǵys Qazaqstanda jarylyp ketken júk kóligine qatysty tergeý aıaqtalǵany habarlanǵan.