ShQO-daǵy «Rahman qaınarlary» shıpajaıy tolyqtaı memleket menshigine ótti
ÓSKEMEN. KAZINFORM – Shyǵys Qazaqstan oblysy Katonqaraǵaı aýdanynda ornalasqan «Rahman qaınarlary» shıpajaıy tolyqtaı memleket balansyna alyndy.
Shıpajaı aktıvteri «Samuryq-Qazyna» holdınginiń elektrondy saýda alańyna shyǵarylǵan. Memlekettik organ balansyna alynǵan múliktiń jalpy quny 3 mlrd teńgeden asady.
Ekinshi kezeń aıasynda shıpajaıdyń 1,5 mlrd teńgege baǵalanǵan jyljymaly jáne jyljymaıtyn múlki memleketke berildi. Onyń ishine jalpy aýdany 7 myń sharshy metrdi quraıtyn turǵyn úıler, angarlar, monsha, sorǵy stantsııasy, garajdar, baqylaý beketteri jáne basqa da nysandar kiredi. Sondaı-aq turmystyq jáne keńse tehnıkalary, jıhazdar, qaıyqtar, teledıdarlar men medıtsınalyq jabdyqtar bar.
Buǵan deıin 2024 jyldyń tamyz aıynda memlekettik organdardyń balansyna jalpy quny 1,6 mlrd teńgeden asatyn 65 jyljymaıtyn múlik berilgen bolatyn. Ol kezde keıbir múlikter sot sheshimi bolmaǵandyqtan tizimge enbeı qalǵan.
Shyǵys Qazaqstan oblysy ákimdiginiń málimetinshe, shıpajaı ýaqytsha oblystyq kásipkerlik basqarmasyna berildi. Aldaǵy ýaqytta ony qalpyna keltirý úshin ınvestorlar izdelmek. Biraq shıpajaıdy qaıtadan jeke menshikke berý jaǵy qazir qarastyrylyp jatqan joq.
Aıta keteıik, «Rahman qaınary» shıpajaıy 1964 jyly ashylǵan. Sýynyń shıpalyq qasıeti onyń quramyndaǵy kómir qyshqylynyń, radonnyń moldyǵynda. Ol túrli aýrý men jarany emdeýde qoldanylady. Shıpajaıdyń burynǵy ıesi Anatolıı Balýshkın «BIPEK AVTO – AZIıA AVTO» AQ basshysy bolǵan.
2024 jyldyń tamyz aıynda Óskemende Anatolıı Balýshkınge qatysty sot isi bastalǵan.