ShQO-daǵy iri kásiporyndar jelsiz kúnderi aýaǵa taraıtyn zııandy shyǵaryndylardy jedel azaıtady

ÓSKEMEN. KAZINFORM – Shyǵys Qazaqstan oblysynda qolaısyz meteorologııalyq jaǵdaı qalyptasqan kúnderi jáne ekologııalyq tótenshe jaǵdaılar kezinde qalaı áreket etýge qatysty óńir ákimdigi men iri kásiporyndar arasynda memorandýmǵa qol qoıyldy.

Atalǵan qujatqa birneshe iri kásiporyn basshylyǵy qol qoıdy. Atap aıtqanda, «Kaztsınk» JShS, «TMK» AQ, «ÝMZ» AQ, «Vostokmashzavod», Óskemen maı zaýyty jáne barlyq jylý energetıka nysandary – Óskemen JEO, Sogra JEO, «Shyǵys jylý» AQ.

- Memorandýmǵa qol qoıý rásiminiń 5 maýsym – Qorshaǵan ortany qorǵaýdyń dúnıejúzilik kúnimen jáne ekologtar kásibı merekesimen tuspa-tus kelýi – erekshe mánge ıe. Ónerkásiptik kásiporyndar basshylaryna ashyq dıalog pen birlesken jumysqa daıyn ekeni úshin rızashylyǵymdy bildiremin. Tek seriktestik, ózara senim jáne turaqty damý arqyly ǵana óńirimizdiń ekologııalyq ál-aýqatyn saqtaı alamyz. Qatysýshylardy osy qujatpen shektelip qalmaı, bul baǵytta júıeli jumysty jalǵastyryp, eń ozyq qoljetimdi tehnologııalardy engizýge, ekologııalyq jaýapkershilik pen óndiristik mádenıetti arttyrýǵa shaqyramyn, - dedi ShQO ákimi Nurymbet Saqtaǵanov.

Memorandým qolaısyz meteorologııalyq jaǵdaı týyndaǵan jaǵdaıda jáne ekologııalyq sıpattaǵy tótenshe jaǵdaılar kezinde barlyq taraptyń úılestirilgen is-qımyldaryn aıqyndaıdy. Bul – shyǵaryndylardy jedel túrde azaıtý, aqparat almasýdyń ashyqtyǵy, monıtorıngke qatysý jáne qorshaǵan ortanyń lastanýyn boldyrmaýǵa baǵyttalǵan aldyn alý sharalary.

Eske salsaq, osyǵan deıin Óskemendegi ekologııa máselesiniń jaı-kúıi týraly maqala jarııalaǵan edik.