ShQO-daǵy ózen-kólder sýyn zańsyz paıdalanýdyń 10 deregi anyqtaldy

Óńirde sý resýrstaryna túsetin júkteme dástúrli túrde artatyn vegetatsııalyq kezeńde sýdy paıdalanýǵa baqylaý kúsheıtildi. Tekserýlerdi Ertis basseındik sý ınspektsııasynyń mamandary Bas prokýratýramen birlesip ázirlengen sýdy zańsyz alý men ótkizýdiń jolyn kesý jónindegi Jol kartasy aıasynda júrgizip jatyr.

Inspektsııa málimetinshe, mamandar kún saıyn bekitilgen sý paıdalaný lımıtteriniń saqtalýyn qadaǵalap, shartsyz jáne ruqsatsyz sý alý faktilerin anyqtaıdy.

— Jyl basynan beri 10 tekserý júrgizilip, sonyń nátıjesinde sý zańnamasy talaptaryn buzýdyń 10 deregi anyqtaldy. Barlyq quqyq buzýshylar ákimshilik jaýapkershilikke tartylyp, jalpy somasy 1,3 mln teńgege jýyq aıyppul salyndy, — dep habarlady Ertis basseındik sý ınspektsııasynan.

Eń kóp zańbuzýshylyq Tarbaǵataı aýdanynda tirkeldi (4 derek). Ulan jáne Kúrshim aýdandarynda eki derekten, Samar aýdanynda bir derek anyqtalǵan.

— Baqylaý tek josparly is-sharalarmen shektelmeıdi. Sondaı-aq turǵyndardyń ótinishteri, buqaralyq aqparat quraldaryndaǵy jarııalanymdar men áleýmettik jelilerdegi habarlamalar da tekserý júrgizýge negiz bolady. Ár kelip túsken habarlama boıynsha jergilikti jerge baryp tekserý júrgiziledi. Eger zańbuzýshylyq rastalsa, qoldanystaǵy zańnamaǵa sáıkes tıisti sharalar qabyldanady, — delingen aqparatta.

Eske salsaq, osyǵan deıin Ekologııa mınıstrligi Aqbulaq ózenindegi maıly daqtarǵa qatysty túsinik bergeni habarlanǵan.