ShQO-daǵy Osınov asýynda zaqymdanǵan kópir qalpyna keltirilip, qozǵalys ashyldy
ÓSKEMEN. KAZINFORM — Shyǵys Qazaqstan oblysyndaǵy Osınov asýynda zaqymdanǵan kópir qalpyna keltirilip, búgin tańǵy 06.00-de qozǵalys qaıta jandandy.
30 maýsym kúni uzaqqa sozylǵan nóser jaýyn-shashynnyń saldarynan Óskemen-Altaı-Úlken Naryn-Katonqaraǵaı-Rahman qaınary tasjolynyń 64-shaqyrymynda ornalasqan Pıhtovka ózeni arqyly ótetin kópirge zaqym kelgen bolatyn. Sonyń saldarynan tasjoldyń 6-66-shaqyrym aralyǵynda bir oske túsetin júktemesi 6 tonnadan asatyn júk kólikteriniń qozǵalysyna ýaqytsha shekteý engizilgen edi.
«QazAvtoJol» UK» AQ ShQO fılıaly Pıhtovka ózeni arqyly ótetin kópirde júrgizilgen apattyq-qalpyna keltirý jumystarynyń aıaqtalǵanyn habarlady.
— Mamandar zaqymdanǵan tirekti qalpyna keltirip, buryn bólshektelgen kópir elementterin qaıta ornatty. Sonymen qatar aldaǵy ýaqytta osyndaı jaǵdaılardyń aldyn alý maqsatynda betkeılerden sýdy uıymdasqan túrde burýǵa arnalǵan qosymsha naýalar ornatyldy. 8 shilde kúni saǵat 06:00–den bastap kópir arqyly kólik qozǵalysy tolyq kólemde qaıta ashyldy, — delingen aqparatta.
Eske salsaq, osyǵan deıin ShQO-daǵy Osınov asýynda kópirge zaqym kelip, qozǵalys shektelgeni habarlanǵan.
