ShQO-daǵy Osınov asýynda kópirge zaqym kelip, qozǵalys shekteldi
ÓSKEMEN. KAZINFORM — Shyǵys Qazaqstan oblysyndaǵy Osınov asýynda kópirge zaqym kelip, júk kólikteriniń qozǵalysyna shekteý qoıyldy.
30 maýsym kúni uzaqqa sozylǵan nóser jaýyn-shashynnyń saldarynan Óskemen-Altaı-Úlken Naryn-Katonqaraǵaı-Rahman qaınary tasjolynyń 64-shaqyrymynda ornalasqan Pıhtovka ózeni arqyly ótetin kópirge zaqym keldi.
— Tirekterdiń biri zaqymdanyp, aralyq qurylystyń shetki plıtasynyń qulaý qaýpi týyndady. Osyǵan baılanysty qaýipsizdikti qamtamasyz etý maqsatynda shuǵyl túrde apattyq-qalpyna keltirý jumystary uıymdastyryldy. Qazirgi ýaqytta aralyq qurylystyń shetki plıtasyn bólshekteý jumystary aıaqtaldy. Kópir tiregin kúsheıtý, sý burý naýalaryn ornatýǵa daıyndyq jumystary júrgizilýde, — deıdi «QazAvtoJol» UK» AQ Shyǵys Qazaqstan oblystyq fılıalynyń dırektory Nurbek Temirhanov.
Jóndeý jumystary eki aýysymda júrgizilip jatyr. Oǵan «KAJservıs» JShS ShQO fılıaly men merdiger uıym — «OblShyǵysJol» JShS-niń mamandary men arnaıy tehnıkasy jumyldyrylǵan. Nysanda táýlik boıy kezekshilik uıymdastyrylǵan.
Tasjoldyń 6-66-shaqyrym aralyǵynda bir oske túsetin júktemesi 6 tonnadan asatyn júk avtokólikteriniń qozǵalysyna ýaqytsha shekteý engizildi. Jeńil avtokólikter úshin qozǵalys ashyq.
Aýyr júk kólikteri úshin oblystyq mańyzy bar Óskemen-Samar-Úlken Naryn avtokólik joly arqyly balama baǵyt qarastyrylǵan. Negizgi ýchaskedegi qozǵalysty 8 shildege deıin tolyq qalpyna keltirý josparlanyp otyr.
Eske salsaq, osyǵan deıin Óskemendegi Ertis kópirin jóndeý jumystary taǵy da keıinge shegerilgeni habarlanǵan.
