ShQO-daǵy órtti sóndirýge tikushaq tartyldy
ASTANA. KAZINFORM – Shyǵys Qazaqstan oblysynyń Kúrshim aýdanyndaǵy Abaı aýyldyq okrýginiń aýmaǵynda bolǵan tabıǵı órt oqshaýlandy. Órttiń bir bóligi «Kúrshim orman sharýashylyǵy» KMM aýmaǵyna taralǵan.
Qol jetýi qıyn orman alqabyndaǵy órtti sóndirýge Qazaqstan Respýblıkasy Ekologııa jáne tabıǵı resýrstar mınıstrliginiń, Tótenshe jaǵdaılar mınıstrliginiń kúshteri, orman sharýashylyǵy qyzmetteri jáne jergilikti atqarýshy organdar jumyldyryldy.
Órt oshaǵyna «Qazavıaormanqorǵaý» desantyn jetkizý úshin Tótenshe jaǵdaılar mınıstrliginiń tikushaqtary men Shyǵys Qazaqstan oblysy ákimdiginiń avıatsııasy tartyldy.
Jerústi tehnıkasy bara almaıtyn ýchaskelerde sý tógý qurylǵysymen jabdyqtalǵan TJM-niń «Qazavıaqutqarý» AQ tikushaǵy áýeden órt sóndirý jumystaryn júrgizdi. Barlyǵy jalpy kólemi 105 tonna sýdy quraıtyn 35 ret sý tógý júzege asyryldy.
Sonymen qatar mamandar jeldiń baǵyty men órttiń taralýyn turaqty baqylaýda ustady.
Barlyq jumyldyrylǵan qyzmetterdiń úılesimdi is-qımylynyń nátıjesinde órttiń odan ári taralýyna jol berilmedi. Eldi mekenderge qaýip joq.
