ShQO-daǵy óndiris ornynan eki adamnyń súıegi tabyldy

ÓSKEMEN. KAZINFORM – Shyǵys Qazaqstan oblysy Altaı aýdanyndaǵy óndiris ornynan tabylǵan adam súıegi jerge 100 jyl buryn kómilgeni anyqtaldy. 

ShQO Polıtsııa departamenti baspasóz qyzmetiniń málimetine súıensek, 18 sáýirde aýdandaǵy óndiris ornynyń aýmaǵynan eki adamnyń bas súıegi men dene súıeginiń synyqtary tabylǵan. Kompanııa qyzmetkerleri bul jaıly birden polıtseılerge habar berdi.

«Tergeý amaldary júrgizilip, tıisti saraptamalar taǵaıyndaldy. Sonyń nátıjesinde, súıekterdiń 100 jyldan astam ýaqyt boıy jerde jatqany anyqtaldy. Biraq ol adamdardyń ólý sebebin bilý múmkin emes», - deıdi departament bastyǵynyń birinshi orynbasary Dýman Qojahmetov.

Onyń aıtýynsha, muraǵat derekterine sáıkes, súıekter tabylǵan aýmaqta kóne jerleý oryndary bar.

«Endi súıekterdi ary qaraı qaıda jiberetindigi belgisiz. Basqa jerge jerleý týraly sheshim qabyldanýy yqtımal», - dep habarlady PD baspasóz qyzmetinen.