ShQO-daǵy óndiris oryndarynda bıyl 82 adam jaraqat alǵan
Shyǵys Qazaqstan oblysyndaǵy óndiris oryndarynda jyl basynan beri 82 adam jaraqat alǵan, dep habarlaıdy Kazinform.
ShQO memlekettik eńbek ınspektsııasy basqarmasynyń málimetine súıensek, bıyl óndiriste zardap shekkender sany birshama azaıyp otyr.
«Jyl basynan beri óńirdegi óndiris oryndarynda bıyl 82 adam jaraqat aldy. Bul ótken jylǵy kezeńmen salystyrǵanda 30 paıyzǵa az. Jaralanǵandar ishinde 6 adam kóz jumdy. Al 40-tan astamy aýyr dárejedegi dene jaraqatyn alǵan», - deıdi basqarma basshysy Baqytbek Qızatov.
Onyń aıtýynsha, oblysta óndiristegi jaraqattaný kórsetkishin azaıtý maqsatynda birqatar shara qolǵa alynǵan. Sonyń biri – «Halyqtyq baqylaý» jobasy. 60-tan astam adamnan qurylǵan arnaıy top 14 kásiporynda baqylaý júrgizýde. Olar jumystyń qaýipsiz júrgizilýin qadaǵalap, qyzmetkerlerge keńes berýde.
Eske salsaq, 11 qazanda ShQO-daǵy kenishte eki jumysshy topyraq astynda qalǵan bolatyn. Abyroı bolǵanda, ekeýi de aman-esen shyǵaryldy.
