ShQO-daǵy Marqakóldiń keı jerlerinde qar qalyńdyǵy 15 sm-ge jetti
ÓSKEMEN. KAZINFORM – Shyǵys Qazaqstan oblysy Marqakól aýdanynyń taýly jerlerinde qar qalyńdap barady.
Búgin qar jabynynyń qalyńdyǵy keı jerlerde 10-15 santımetrdi qurap, aýa temperatýrasy –5-12°S aralyǵynda qubylyp tur.
Jalpy Marqakólde jyl saıyn qys yzǵarly, qarly bolady. Munda Qazaqstandaǵy eń sýyq jer ornalasqan. Ortasha táýliktik temperatýra 0°S-tan tómen bolatyn kez 203 kúnge sozylady.
– Qysta temperatýra keıde –45°S-qa, keıde –53°S-qa deıin tómendeıdi. Jeltoqsannan aqpanǵa deıin birneshe apta boıy temperatýra -35-40°S shamasynda bolady. Marqakólge alǵashqy qar tamyzdyń basynda jaýady. Keı jaǵdaılarda 15-20 santımetrlik qar tamyzda da túsýi múmkin, biraq ol tez erip ketedi. Qurqum jotasynyń shyńdaryn qyrkúıekte aq qar jabady, - dep habarlady Marqakól memlekettik tabıǵı qoryǵynan.
Qar jabyny 110-170 kúnge saqtalady. Ortasha qar qalyńdyǵy 87 santımetr shamasynda, al qardyń eń kóp jınalýy naýryzdyń birinshi-ekinshi onkúndiginde tirkeledi.
Keı jyldary qardyń qalyńdyǵy 150-200 santımetrge deıin jetken. Eń kóp qar jaýǵan qys 1996-1997, 1997-1998, 2000-2001 jyldary boldy.
Eske salsaq, osyǵan deıin Qaraǵandy oblysynda alǵashqy qar jaýǵany habarlanǵan.