ShQO-daǵy Marqakól aýdanynda tótenshe jaǵdaı jarııalandy

ÓSKEMEN. KAZINFORM – Shyǵys Qazaqstan oblysy Marqakól aýdanynyń aýmaǵyndaǵy Orta Terekti sý qoımasynda obektilik sıpattaǵy tótenshe jaǵdaı jarııalandy.

Bul týraly Kazinform agenttiginiń tilshisine aýdan ákiminiń orynbasary Nursultan Beısenov aıtyp berdi. 

- Orta Terekti sý qoımasy Marqakól aýyldyq okrýgi aýmaǵynda ornalasqan. 2024 jyly sý qoımasyna kópfaktorly zertteý júrgizildi. Sol kezde Shyǵys Qazaqstan oblysy ákiminiń orynbasary Baqytjan Baıahmetov kelgen. Sý qoımasyn qarap shyǵyp, jóndeý jumystaryn júrgizýge tapsyrma bergen, - deıdi ol.

Nursultan Beısenovtyń aıtýynsha, Orta Terekti sý qoımasynda obektilik sıpattaǵy tótenshe jaǵdaı jarııalaýǵa aýdan ákimi 8 qańtar kúni qol qoıǵan. Biraq bul dál qazir qandaı da bir qaýip tónip tur degen sóz emes.

Al sý qoımasynyń apattyq jaǵdaıda turǵandyqtan jóndeýdi qajet etetindigi ras. 

- Tótenshe jaǵdaı aldyn ala oılastyrylyp baryp jarııalandy. Sý qoımasyn kóktemge deıin jóndeý qajet. Áıtpese aldaǵy ýaqytta úıler men turǵyndarǵa qaýip tónýi múmkin. Bizdiń maqsat – sonyń aldyn alý. Kúrdeli jóndeý jumystaryn bastaý úshin konkýrstyq rásimderdi ótkizip, merdigerdi anyqtaýymyz kerek. Ázirge naqty qansha qarajat jumsalatyndyǵy belgisiz, - deıdi aýdan ákiminiń orynbasary. 

Eske salsaq, osyǵan deıin AQSh-tyń 5 shtatynda tótenshe jaǵdaı jarııalanǵany habarlanǵan.