ShQO-daǵy lagerlerge Qazaqstannyń basqa óńirlerin de balalar keledi
ÓSKEMEN. KAZINFORM – Shyǵys Qazaqstan oblysyndaǵy lagerlerde respýblıkanyń túkpir-túkpirindegi balalarǵa jazǵy demalysty uıymdastyrý úshin pılottyq joba qolǵa alynady.
Búgin oblys ákimdiginde ótken jınalys barysynda balalardyń jazǵy demalysy jaıly sóz qozǵaldy. ShQO Bilim basqarmasynyń basshysy Innesa Chernyshevanyń aıtýynsha, aımaq boıynsha 1-10 synyptardyń 93 519 oqýshysy jazǵy demalyspen jáne saýyqtyrýmen qamtylady.
«Barlyǵy 487 jazǵy lager jumys isteıdi. Onyń ishinde 13-i qala syrtynda, 270-i mektep janynda ornalasqan. Al Samar aýdanynda áskerı-sporttyq lager ashylady. Onda barǵan balalar áskerı-taktıkalyq oıyndar oınap, áskerı qyzmetkerlermen kezdesip, túrli sporttyq jarysqa qatysady», - deıdi ol.
Kópbalaly jáne az qamtylǵan otbasylardyń balalary jazǵy lagermen túgeldeı qamtylmaq. ShQO ákimi Ermek Kósherbaev óz sózinde ishki týrızmdi uıymdastyrý úshin óńirdiń múmkindikterin belsendi paıdalanýǵa shaqyrdy. Ol Shyǵys Qazaqstannyń qala syrtyndaǵy lagerlerine kóktemgi sý tasqynynan zardap shekken aımaqtardan keletin balalardy kóptep qabyldaýdy usyndy.
«Bir jerde munaı óndiredi, bir jerde egin egedi. Al, bizdiń halqymyzdyń ortaq murasy – ásem tabıǵaty. Óz azamattarymyzdyń osynda kelip demalýy úshin tıisti jaǵdaıdy jasaýymyz kerek. Bul – ishki týrızmge qatysty másele. Osyǵan qatysty jumysty bıyl bastaýdy usynamyn. Basqa óńirlerdegi, ásirese sý tasqynynan zardap shekken aımaqtardaǵy balalardy qonaq qylaıyq. Ol úshin bilim, dene shynyqtyrý jáne sport, týrızm basqarmalary, aýdan ákimdikteri qajetti baǵdarlamalardy ázirlep, kásipkerlerdi de tartý qajet. Keleshekte Shyǵys Qazaqstannyń óz «Artegi» bolady», - dedi ákim.
