ShQO-daǵy Kúrshim aýdanynda iri qaraǵa qarasan tıdi me
ÓSKEMEN. KAZINFORM — Shyǵys Qazaqstan oblysyndaǵy Kúrshim aýdanynda mal óliminiń sebebi anyqtalyp jatyr.
Kúrshim aýdany Maraldy aýylynda eki kún ishinde segiz sıyr ólgen. Aldyn ala derek boıynsha buǵan pasterellez nemese qarasan sııaqty juqpaly aýrýlar sebep bolýy múmkin.
Qazir aýylda veterınarlyq jáne sanıtarlyq qyzmet mamandary jumys istep, zerthanalyq saraptamalar júrgizilip jatyr. Mal ólip jatqany týraly habar túsken soń aýdan ákimdigi birden komıssııa qurdy. Eki saǵat ishinde mamandar Berezet ýchaskesi aýmaǵyna baryp, mal ólekselerin kórdi.
— Sol kezde 6 iri qaranyń óleksesin tirkedik. Qaýipti ınfektsııalar men ýly zattarǵa synamalar alyndy. Aýylda mal ıelerine túsindirý jumystary júrgizilip keledi. Qazir jaǵdaı baqylaýda, turǵyndarǵa eshqandaı qaýip tónip turǵan joq, — dedi aýdannyń bas sanıtar dárigeri Meńdigúl Sádýaqasova.
Barlyq materıal oblystyq juqpaly aýrýlar zerthanasyna jiberilgen. Jergilikti turǵyndar maldyń qyrylýyna jaqyn mańdaǵy altyn óndiretin fabrıkanyń jumysy áser etýi múmkin dep alańdaıdy.
— Bizde iri qara ýlanyp qaldy ma degen kúdik bar. Fabrıkadan shyǵatyn qaldyqtardyń jaıylymǵa zııany bar ma dep qorqamyz, — deıdi olar.
Alaıda veterınarlar klınıkalyq belgilerdiń ýlanýǵa emes, aýrýǵa kóbirek keletinin aıtyp otyr. Sońǵy eki sıyr jany bar kezinde jiti tekserilgen.
— Zertteý kezinde aýrý maldyń dene qyzýy joǵary bolǵany anyqtaldy. Bul — pasterellezdiń negizgi belgileriniń biri. Barlyq ólekse ýaqtyly kómilip, indettiń taralý qaýpi joıyldy, — dedi «Kúrshim-vet» kommýnaldyq kásipornynyń epızootologi Satty Dútbaev.
Óńirdegi mal ólimi máselesine qatysty Shyǵys Qazaqstan oblystyq ákimdigi túsinikteme berdi.
— Aýyldaǵy óndiris oryndary ekologııalyq talaptardyń saqtalýyna qatysty tekseriledi. Ekologııalyq saraptama nátıjeleri osy aptanyń sońyna deıin daıyn bolady dep kútilip otyr. Al veterınarııalyq synamalardyń qorytyndylary 4 qazanǵa deıin shyǵarylmaq. Búginge deıin Maraldy aýylynda basqa mal ólimi tirkelgen joq, — dep habarlady ákimdikten.
Eske salsaq, osyǵan deıin ShQO-da kóshede ıtti baltalaǵan adam izdestirilip jatqany habarlanǵan.